AKP ព្រះវិហារ ថ្ងៃទី២៨ ខែមេសា ឆ្នាំ២០២៥-

ឯកឧត្តម គីម រិទ្ធី អភិបាលខេត្តព្រះវិហារ និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត បានដឹកនាំក្រុមការងារ និងអាជ្ញាធរមូលដ្ឋាន ចុះសួរសុខទុក្ខ និងនាំយកអំណោយដ៏ថ្លៃថ្លារបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្តល់ជូនប្រជាពលរដ្ឋរងគ្រោះដោយសារខ្យល់កន្ត្រាក់ចំនួន ៩៩គ្រួសារ នៅឃុំខ្យង និងឃុំតស៊ូ ក្នុងស្រុកជ័យសែន នៅព្រឹកថ្ងៃទី២៨ ខែមេសា ឆ្នាំ២០២៥។

ក្នុងឱកាសនោះ ឯកឧត្តម គីម រិទ្ធី បានមានប្រសាសន៍ពាំនាំនូវប្រសាសន៍ផ្តាំផ្ញើសាកសួរ សុខទុក្ខពី សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះ បងប្អូនទាំងអស់ដោយក្តីនឹកលឹក និងបានសម្តែងនូវការសោកស្តាយយ៉ាងក្រៃលែងចំពោះការបាត់បង់ជីវិត និងការខូចខាតទ្រព្យសម្បត្តិ និងលំនៅដ្ឋានរបស់បងប្អូន ដែលបង្កឡើងដោយគ្រោះធម្មជាតិខ្យល់កន្ត្រាក់ និងផ្គររន្ទះកាលពីពេលថ្មីៗកន្លងមកនេះ។ ឯកឧត្តមអភិបាលខេត្តបានបញ្ជាក់ថា គ្រោះធម្មជាតិខ្យល់កន្ត្រាក់បានបណ្តាលឱ្យខូចខាតលំនៅដ្ឋានប្រជាពលរដ្ឋជាច្រើនខ្នង នៅក្នុងស្រុកជ័យសែន និងស្រុកជាំក្សាន្ត។ ដោយឡែក នៅស្រុកជាំក្សាន្ត មានប្រជាពលរដ្ឋម្នាក់បានបាត់បង់ជីវិតដោយរន្ទះបាញ់ថែមទៀតផង។ ក្រោយពីទទួលបានរបាយការណ៍អំពីហេតុការណ៍នេះ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា មានការព្រួយបារម្ភយ៉ាងខ្លាំងចំពោះសុខទុក្ខបងប្អូន និងបានបញ្ជូនអំណោយសង្គ្រោះបន្ទាន់តាមរយៈសាខាកាកបាទក្រហមកម្ពុជាខេត្ត មកជូនបងប្អូនភ្លាមៗ។

បន្ទាប់ពីបានផ្តល់អំណោយសង្គ្រោះបន្ទាន់រួចមក ឯកឧត្តម គីម រិទ្ធី បានដឹកនាំក្រុមការងារបន្តចុះពិនិត្យទីតាំងផ្ទាល់ដល់លំនៅដ្ឋានរបស់ប្រជាពលរដ្ឋដែលរងការខូចខាតធ្ងន់ធ្ងរនៅក្នុងឃុំខ្យង និងឃុំតស៊ូ។ តាមរយៈការចុះពិនិត្យនេះ ឯកឧត្តមអភិបាលខេត្តបានឃើញផ្ទាល់នូវទំហំនៃការខូចខាត និងបានជួបសំណេះសំណាល ជាមួយប្រជាពលរដ្ឋដែលរងគ្រោះ ដើម្បីស្វែងយល់ពីតម្រូវការជាក់ស្តែងរបស់ពួកគាត់។
ទន្ទឹមនឹងការខូចខាតលំនៅដ្ឋានរបស់ប្រជាពលរដ្ឋដោយខ្យល់កន្ត្រាក់នេះ ពិសេសផ្ទះប្រជាពលរដ្ឋដែលរលំទាំងស្រុង និងខ្វះខាតកម្លាំងពលកម្ម ដូចជាគ្រួសារចាស់ជរា ស្ត្រីមេម៉ាយ ឯកឧត្តមបានណែនាំដល់អាជ្ញាធរភូមិ ឃុំ និងប្រជាពលរដ្ឋ ត្រូវចូលរួមអនុវត្តរូបភាព "មិត្តជួយ មិត្ត" ពោលគឺក្នុងនាមជាអ្នកជិតខាង ត្រូវជួយគ្នាទៅវិញទៅមក ដូចជាជួយឧបត្ថម្ភជាឈើ និងស័ង្កសី បន្តិចបន្តួច ឬជួយជាកម្លាំងពលកម្ម ធ្វើយ៉ាងណាជួយលើកផ្ទះ ឬខ្ទម ដើម្បីឱ្យពួកគាត់បានរស់នៅសមរម្យឡើងវិញ។

សូមជម្រាបជូនថា អំណោយដែលចែកជូននាពេលនេះ ក្នុង១គ្រួសារៗ ទទួលបាន អង្ករ ៣០គីឡូក្រាម មី១កេស ត្រីខ១យួរ ទឹកស៊ីអ៊ីវ ១យួរ ឃីត១កញ្ចប់ និងថវិកាចំនួន ៥ម៉ឺនរៀល។ ចំពោះគ្រួសារដែលរលំផ្ទះទាំងស្រុងចំនួន ១១គ្រួសារ ទទួលបានតង់កៅស៊ូបន្ថែម១ ទៀតផងដែរ៕

ដោយ៖ រិទ្ធី ប្រភព៖ មន្ទីរព័ត៌មានខេត្តព្រះវិហារ