AKP កំពង់ចាម ថ្ងៃទី២៨ ខែមេសា ឆ្នាំ២០២៥-- 

នៅទីស្នាក់ការសាខាកាកបាទក្រហមកម្ពុជា ខេត្តកំពង់ចាម នាព្រឹកថ្ងៃចន្ទ ទី២៨ ខែមេសា ឆ្នាំ២០២៥ មានរៀបចំកិច្ចប្រជុំបូកសរុបលទ្ធផលសកម្មភាពការងារ៣ខែដើម ឆ្នាំ២០២៥ និងទិសដៅសម្រាប់អនុវត្តបន្ត ក្រោមអធិបតីភាពឯកឧត្តម អ៊ុន ចាន់ដា ប្រធានគណៈកម្មាធិការសាខា ដោយមានការចូលរួមពីឯកឧត្តម លោកជំទាវ អនុប្រធាន លោក លោកស្រី ជាហេរញ្ញឹក លេខាធិការ សមាជិក សមាជិកា គណៈកម្មាធិការសាខា នាយក នាយករង និងមន្ត្រីក្រុមប្រតិបត្តិសាខា។

មានប្រសាសន៍ក្នុងកិច្ចប្រជុំ ឯកឧត្តម អ៊ុន ចាន់ដា  អភិបាលខេត្ត និងជាប្រធានគណៈកម្មាធិការសាខា បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ រួមទាំងមន្ត្រីក្រុមប្រតិបត្តិ ដែលបានខិតខំបំពេញភារកិច្ចយ៉ាងសកម្ម ធ្វើជាសេនាធិការឱ្យគណៈកម្មាធិការសាខា ក្នុងការដឹកនាំជំរុញធ្វើឱ្យវិស័យអាទិភាពទាំង៤របស់កាកបាទក្រហមកម្ពុជា រយៈពេល៣ខែដើមឆ្នាំ២០២៥។ ពិសេសការចូលរួមលើកកម្ពស់សកម្មភាពការងារឥស្សរជនឆ្នើមថ្នាក់ជាតិនៃសាខា ក្នុងកិច្ចការថែទាំសុខភាពសហគមន៍។ ការចូលរួមអប់រំផ្សព្វផ្សាយ លើកកម្ពស់ អំពីសុវត្ថិភាពចរាចរណ៍ផ្លូវគោក និងបរិយាបន្ន។ ការបណ្តុះបណ្តាលជាមូលដ្ឋានដល់យុវជន អ្នកស្ម័គ្រចិត្តកាកបាទក្រហមកម្ពុជា ការកសាងភាពធន់សហគមន៍  ការអភិវឌ្ឍស្ថាប័ន និងការផ្តល់ជំនួយសង្រ្គោះ ផ្តល់អំណោយមនុស្សធម៌ជូនជនរងគ្រោះ និងជនងាយរងគ្រោះបានទាន់ពេលវេលា  ស្របតាមទិសស្លោក “ទីណាមានទុក្ខលំបាក ទីនោះ មានកាកបាទក្រហមកម្ពុជា”។

ឯកឧត្តមប្រធានគណៈកម្មការធិការសាខាបាន ធ្វើការក្រើនរំលឹក និងជំរុញដល់គណ:កម្មាធិការសាខា អនុសាខា និងក្រុមប្រតិបត្តិ ត្រូវយកចិត្តទុកដាក់ខ្ពស់ក្នុងសកម្មភាពមនុស្សធម៌កាន់តែប្រសើរ ជួយដល់ជនរងគ្រោះ និងអ្នកងាយរងគ្រោះ ប្រកបដោយប្រសិទ្ធភាពខ្ពស់ និងត្រូវកសាងកម្លាំងនៅមូលដ្ឋានឲ្យកាន់តែរឹងមាំ ដើម្បីចូលរួមកសាងភាពធន់នឹងភាពរីកចម្រើននៅសហគមន៍ តាមវិធានអនាម័យស្អាត៣យ៉ាង។ បន្តសហការចុះអប់រំផ្សព្វផ្សាយអំពីសុវត្ថិភាពចរាចរណ៍ផ្លូវគោក ក្នុងឱកាសពិធីបុណ្យជាតិសំខាន់ៗ  និងបន្តជំរុញការបណ្ដុះបណ្ដាលជាមូលដ្ឋាន ជូនយុវជន អ្នកស្ម័គ្រចិត្តកាកបាទក្រហម ដែលជាប្រតិបត្តិករ និងជាកម្លាំងចលករ មិនអាចខ្វះបាន ក្នុងការអនុវត្តវិស័យអាទិភាពទាំង៤របស់កាកបាទក្រហមកម្ពុជា និងបន្តខិតខំកៀរគរមូលនិធិពីសប្បុរសជនគ្រប់មជ្ឈដ្ឋាន ដើម្បីទ្រទ្រង់នូវសកម្មភាពមនុស្សធម៌របស់សាខា៕

ដោយ ឆាយ ម៉ុត