AKP ភ្នំពេញ ថ្ងៃទី២៨ ខែមេសា ឆ្នាំ២០២៥ -- ប្រទេស​ចិន និង​កៀហ្ស៊ីស៊ីស្ថាន​ បាន​ព្រមព្រៀង​គ្នា​ក្នុង​ការ​គាំទ្រ​ពាណិជ្ជកម្ម​សេរី ការពារ​ច្បាប់​អន្តរជាតិនិង​ការពារ​សិទ្ធិ​ស្រប​ច្បាប់​រៀងៗ​ខ្លួន និង​ផលប្រយោជន៍​ក្នុង​តំបន់។

​ក្នុងដំណើរទស្សនកិច្ច​របស់​រដ្ឋមន្ត្រី​ការបរទេស​ចិន លោក វ៉ាង យី (Wang Yi) ​អំឡុង​ពេល​ជួប​ជាមួយ​សមភាគី​កៀហ្ស៊ីស៊ីស្ថាន លោក ជីនប៊េក គូលូប៊េវ (Jeenbek Kulubaev) បាននិយាយថា ក្នុងនាមជាប្រទេសជិតខាងជិតស្និទ្ធដែលតភ្ជាប់ដោយភ្នំ និងទន្លេ ប្រទេសចិន និងកៀហ្ស៊ីស៊ីស្ថានតែងតែប្រព្រឹត្តចំពោះគ្នាទៅវិញទៅមកដោយទំនុកចិត្ត និងស្មោះត្រង់ ហើយជាបងប្អូន និងដៃគូដែលអាចទុកចិត្តបាន។

លោក វ៉ាង ជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន បាននិយាយថា ក្រោមការណែនាំជាយុទ្ធសាស្រ្តរបស់ប្រធានាធិបតីចិន លោក ស៊ី ជីនពីង (Xi Jinping) និងប្រធានាធិបតីកៀហ្ស៊ីស៊ីស្ថាន លោក សាដៀ ចាប៉ារ៉ូវ (Sadyr Japarov)ទំនាក់ទំនងទ្វេភាគីបានអភិវឌ្ឍន៍យ៉ាងឆាប់រហ័ស ដោយលោកបានកត់សម្គាល់ថា ប្រទេសទាំងពីរកំពុងធ្វើការរួមគ្នាដើម្បីកសាងសហគមន៍នៃអនាគតរួមគ្នាដែលមានភាពជាអ្នកជិតខាងល្អ និងភាពរុងរឿងទៅវិញទៅមក។

លោក វ៉ាង បាននិយាយថា ប្រទេសចិនគាំទ្រយ៉ាងខ្លាំងក្លាចំពោះប្រទេសកៀហ្ស៊ីស៊ីស្ថានក្នុងការស្វែងរកផ្លូវអភិវឌ្ឍន៍ដែលសមស្របនឹងលក្ខខណ្ឌជាតិរបស់ខ្លួន ប្រឆាំងយ៉ាងខ្លាំងចំពោះការជ្រៀតជ្រែកពីខាងក្រៅនៅក្នុងកិច្ចការផ្ទៃក្នុងរបស់ប្រទេសកៀហ្ស៊ីស៊ីស្ថាន ហើយជឿជាក់ថាប្រទេសកៀហ្ស៊ីស៊ីស្ថាននឹងបន្តគាំទ្រជំហរស្របច្បាប់របស់ប្រទេសចិនលើបញ្ហាទាក់ទងនឹងផលប្រយោជន៍ស្នូលរបស់ខ្លួន។

ចំណែកលោក គូលូប៊េវ បាននិយាយថា ដំណើរទស្សនៈកិច្ចដ៏ជោគជ័យរបស់លោក ចាប៉ារ៉ូវ ទៅកាន់ប្រទេសចិនក្នុងខែកុម្ភៈដោយបានចាក់បញ្ចូលភាពរឹងមាំទៅក្នុងទំនាក់ទំនងចិន-កៀហ្ស៊ីស៊ីស្ថាន ហើយថ្លែងអំណរគុណដល់ប្រទេសចិនសម្រាប់ការគាំទ្រដ៏រឹងមាំសម្រាប់ការអភិវឌ្ឍសេដ្ឋកិច្ច និងសង្គមរបស់ប្រទេសកៀហ្ស៊ីស៊ីស្ថាន។

លោកបាននិយាយថា ប្រទេសកៀហ្ស៊ីស៊ីស្ថានមានឆន្ទៈក្នុងការធ្វើការជាមួយប្រទេសចិន ដើម្បីអនុវត្តន៍តាមការណែនាំរបស់ប្រមុខរដ្ឋទាំងពីរ ធ្វើឱ្យកាន់តែស៊ីជម្រៅនូវមិត្តភាពអ្នកជិតខាងល្អ និងកសាងសហគមន៍កៀហ្ស៊ីស៊ីស្ថាន-ចិន ជាមួយនឹងអនាគតរួមគ្នា៕

ដោយ៖ មូល មិនា (ប្រភព៖ ភីបផលដេលី)