AKP ភ្នំពេញ ថ្ងៃទី២៨ ខែមេសា ឆ្នាំ២០២៥-- បន្ទាប់ពីទទួលបានការរាយការណ៍ពីអនុសាខាស្រុកក្រូចឆ្មារថាប្រជាពលរដ្ឋបានរងគ្រោះដោយខ្យល់កន្ត្រាក់ នៅថ្ងៃអាទិត្យ ទី២៧ ខែមេសា ឆ្នាំ២០២៥  ឯកឧត្តម ប៉ែន កុសល្យ ប្រធានគណៈកម្មាធិការសាខាកាកបាទក្រហមកម្ពុជាខេត្តត្បូងឃ្មុំ បានចាត់ឱ្យលោក រស់ សុខន នាយកប្រតិបត្តិសាខា ដឹកនាំក្រុមប្រតិបត្តិសាខា និងអនុសាខាស្រុកក្រូចឆ្មារ ជាមួយក្រុមកាកបាទក្រហមកម្ពុជាឃុំទួលស្នួល ឃុំឈូក និងអ្នកស្ម័គ្រចិត្តភូមិគោលដៅ ព្រមទាំងសហការីចុះទៅសួរសុខទុក្ខ និងនាំយកអំណោយមនុស្សធម៌របស់សាខាផ្តល់ជូនដល់គ្រួសារដែលបានរងផលប៉ះពាល់របើកដំបូលខ្លះៗដោយសារភ្លៀងមានខ្យល់កន្ត្រាក់មកជាមួយចំនួន១១គ្រួសារ នៅឃុំទួលស្នួលចំនួន១០គ្រួសារ និងឈូកចំនួន១គ្រួសារ ស្ថិតក្នុងស្រុកក្រូចឆ្មារ ខេត្តត្បូងឃ្មុំ។

នាឱកាសនោះ លោក រស់ សុខន បាននាំយកនូវប្រសាសន៍ផ្តាំផ្ញើពីការសួរសុខទុក្ខ និងក្ដីនឹករឭកពីសំណាក់ឯកឧត្តម ប៉ែន កុសល្យ ប្រធានគណៈកម្មាធិការសាខាកាកបាទក្រហមកម្ពុជាខេត្តត្បូងឃ្មុំ ជាមួយឯកឧត្តម អ៊ាង សុផល្លែត ប្រធានកិត្តិយសសាខា និងជាពិសេសពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជាមួយក្រុមគ្រួសារជនរងគ្រោះទាំង១១គ្រួសារ ក្នុងហេតុការណ៍ខាងលើ។ ជាការពិតណាស់ដែលជានិច្ចកាលសម្ដេចតែងតែគិតគូរពីសុខទុក្ខរបស់បងប្អូនប្រជាពលរដ្ឋគ្រប់ទិសទីដែលជាជនរងគ្រោះ និងងាយរងគ្រោះគ្រប់ៗគ្នាស្របតាមពាក្យស្លោក "ទីណាមានទុក្ខលំបាក ទីនោះមានកាកបាទក្រហមកម្ពុជា" និង "កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នាមិនទុកនរណាម្នាក់ចោល"។

ជាមួយគ្នានេះដែរ លោកក៏បានជូនពរដល់គ្រួសាររងគ្រោះទាំងអស់សូមមានសុខភាពល្អដោយបានអំពាវនាវដល់បងប្អូនប្រជាពលរដ្ឋទាំងអស់មេត្តាខិតខំថែរក្សាសុខភាពឱ្យបានល្អដោយប្រកាន់ភ្ជាប់នូវអនាម័យ រស់នៅស្អាត ហូបស្អាត ផឹកស្អាត និងគោរពអនុវត្តតាមវិធានការនានារបស់ក្រសួងសុខាភិបាល ជាពិសេសសូមបងប្អូនបន្តអនុវត្តឱ្យបានខ្ជាប់ខ្ជួននូវវិធានការតិចអំបិល តិចស្ករ តិចខ្លាញ់ ដើម្បីការពារខ្លួនពីជំងឺឆ្លង ឬមិនឆ្លងដែលកំពុងរីកដុះដាលនៅក្នុងពេលនេះទៅតាមការណែនាំរបស់ក្រសួងសុខាភិបាល។

សូមជម្រាបជូនថា អំណោយជូនដល់គ្រួសារនីមួយៗទទួលបានអង្ករ២៥គីឡូក្រាម មី១កេស ទឹកត្រី១យួរ ទឹកស៊ីអ៊ីវ១យួរ ប្រេងឆា១ដប និងថវិកាមួយចំនួនផងដែរ៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)