AKP ភ្នំពេញ ថ្ងៃទី២៧ ខែមេសា ឆ្នាំ២០២៥ --សិក្ខាសាលាស្តីពី «ការវិវត្តន៍នៃប្រព័ន្ធផ្សព្វផ្សាយសម្រាប់វិស័យកីឡា» (The Evolution of  Mass Media in Sports) ដ៏មានសារៈសំខាន់នេះ នឹងចូលរួមពង្រឹងគុណភាពការរាយការណ៍ និងអត្ថាធិប្បាយ ការរៀបចំ និងការផលិតដល់អ្នកសារព័ត៌មាននៅកម្ពុជា។ ការរៀបចំសិក្ខាសាលានេះឡើងក្នុងគោលបំណងចែករំលែកចំណេះដឹង និងផ្លាស់ប្តូរបទពិសោធន៍លើការរៀបចំ ការផលិត និងការផ្សព្វផ្សាយកម្មវិធីពាក់ព័ន្ធវិស័យកីឡា ដែលកំពុងទទួលបានកំណើនការគាំទ្រយ៉ាងច្រើនពីសាធារណជនទូទៅ ជាពិសេសក្នុងស្រទាប់យុវជន ដែលបានឆ្លុះបញ្ចាំងយ៉ាង ច្បាស់នៅក្នុងអំឡុងពេលដែលកម្ពុជាធ្វើជាម្ចាស់ផ្ទះព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣។ ក្រសួងព័ត៌មានបានសហការជាមួយក្រុមហ៊ុន RMS Sports ក្នុងការរៀបចំសិក្ខាសាលាស្តីពី «ការវិវត្តន៍នៃប្រព័ន្ធផ្សព្វផ្សាយសម្រាប់វិស័យកីឡា» (The Evolution Of Mass Media in Sports) នាព្រឹកថ្ងៃសៅរ៍ ទី២៦ ខែមេសា ឆ្នាំ២០២៥ នៅទីស្តីការក្រសួងព័ត៌មានដោយមានការអញ្ជើញចូលរួមពីឯកឧត្តមបណ្ឌិត ឆាយ សុផល រដ្ឋលេខាធិការ និងជាតំណាងឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មាន ថ្នាក់ដឹកនាំក្រសួងព័ត៌មាន ថ្នាក់ដឹកនាំ និងអ្នកជំនាញការផលិតកម្មវិធីក្នុងវិស័យកីឡាពីក្រុមហ៊ុន RMS Sports នៃប្រទេសម៉ាឡេស៊ី និងមន្រ្តីជំនាញពីអគ្គនាយកដ្ឋានទាំង៥ចំណុះក្រសួងព័ត៌មាន និងអ្នកសារព័ត៌មានជាតិ សរុបប្រមាណ ៧០រូប។ នេះបើយោងតាមសេចក្តីប្រកាសព័ត៌មាន។

ក្នុងឱកាសនោះ ដើម្បីឆ្លើយតបទៅនឹងការវិវត្តដ៏ឆាប់រហ័សនៃបច្ចេកវិទ្យាទំនើបក្នុងប្រព័ន្ធផ្សព្វផ្សាយ និងតម្រូវការគុណភាពពីអ្នកគាំទ្រវិស័យកីឡា ការបន្តអភិវឌ្ឍសមត្ថភាពរបស់អ្នកសារព័ត៌មាន តាមរយៈការចែករំលែកបទពិសោធន៍ ចំណេះដឹង និងការអនុវត្តល្អៗពីអ្នកជំនាញពិតជាមានសារៈសំខាន់។ ស្ថិតក្នុងបរិបទនេះ  សិក្ខាសាលាបានប្រព្រឹត្តឡើងដោយមានការលើកយកប្រធានបទគន្លឹះពាក់ព័ន្ធចំនួន៣ រួមមាន៖ ១) Sports Broadcasting & Production in Multi-Sports  Games ២) ស្ថានភាពបច្ចុប្បន្ន និងអនាគតនៃប្រព័ន្ធផ្សព្វផ្សាយសម្រាប់វិស័យកីឡានៅកម្ពុជា និង៣) ការលើកកម្ពស់ការផ្សព្វផ្សាយវិស័យកីឡាតាមរយៈប្រព័ន្ធផ្សព្វផ្សាយគ្រប់ប្រភេទ។

គួរបញ្ជាក់ផងដែរថា សិក្ខាសាលានេះ គឺជាសកម្មភាពមួយត្រៀមឆ្ពោះទៅកាន់ការរៀបចំវេទិកាអន្តរជាតិលើកទី១ស្តីពីប្រព័ន្ធផ្សព្វផ្សាយសម្រាប់វិស័យកីឡាកម្ពុជា ដែលគ្រោងនឹង រៀបចំនៅក្នុងខែវិច្ឆិកា ឆ្នាំ២០២៥ ខាងមុខនេះក្រោមកិច្ចកិច្ចសហការរវាងក្រសួងព័ត៌មាន និង ក្រុមហ៊ុន RMS Sports។ វេទិកាអន្តរជាតិដំបូងនេះ រំពឹងថានឹងប្រមូលផ្តុំតួអង្គពាក់ព័ន្ធសំខាន់ៗទាំងអស់ក្នុងប្រព័ន្ធផ្សព្វផ្សាយ និងកីឡា ប្រមាណ១ពាន់នាក់៕

ដោយ៖ រិទ្ធី