AKP ភ្នំពេញ ថ្ងៃទី២៧ ខែមេសា ឆ្នាំ២០២៥–ឆ្លើយតបនឹងការព្រួយបារម្ភ និងចម្ងល់លើបញ្ហា អាម៉េរិក ដាក់ពន្ធមកលើកម្ពុជា ដោយសារតែឱនភាពនៃការនាំចេញ និងនាំចូល ខុសគ្នាឆ្ងាយ ត្រូវបានសម្តេចធិបតី ហ៊ុន​ ម៉ាណែត​ នាយករដ្ឋមន្ត្រីនៃកម្ពុជា បកស្រាយថា ការដាក់ពន្ធថ្មីៗនេះរបស់អាម៉េរិក គ្មានប្រទេសណាមួយដឹងជាមុននោះឡើយ គឺជាបញ្ហាពន្ធសកល ខណៈដែលគម្លាតខុសគ្នាឆ្ងាយនៃឱនភាពពាណិជ្ជកម្ម រវាប្រទេសអ្នកមាន ដូចជាអាម៉េរិក ជាមួយកម្ពុជា ត្រូវតែមាន ។

ក្នុងឱកាសអញ្ជើញជាអធិបតី ក្នុងពិធីសំណេះសំណាលជាមួយសហជីព សេដ្ឋកិច្ចក្រៅប្រព័ន្ធ និងសមាគម បុគ្គលិកសិក្សា ដើម្បីអបអរសាទរ​ ខួបអនុស្សាវរីយ៍លើកទី១៣៩ នៃទិវាពលកម្មអន្តរជាតិ ១ឧសភា ឆ្នាំ២០២៥ នៅមណ្ឌលសន្និបាត និងពិព័រណ៍អន្តរជាតិជ្រោយច ង្វារ (OCIC) នាព្រឹកថ្ងៃទី២៧ ខែមេសា ឆ្នាំ២០២៥នេះ សម្តេចធិបតី បានគូសបញ្ជាក់ថា កម្ពុជា នៅចរចា៣ខែជាមួយអាម៉េរិក ដូ​ច​នេះអាម៉េរិកដាក់ពន្ធ លើកម្ពុជា កម្ពុជា មិនខុសទេ  ព្រោះនេះជាការសម្រេចចិត្តរបស់អាម៉េរិក មិនមែនតែកម្ពុជា គឺមានជិត២០០ប្រទេសជាប់ពន្ធដូចគ្នា ជាការដាក់ពន្ធសកល ។

ក្នុងនោះសម្តេចធិបតី យល់ឃើញថា ដោយសារតែប្រធានាធិបតីអាម៉េរិក គិតថាការនាំចេញ នាំចូលអាម៉េរិក ជាមួយប្រទេសផ្សេងៗ ខុសគ្នាខ្លាំងពេក គិតថាប្រទេសផ្សេង ទាញចំណេញលើអាម៉េរិកច្រើន ដូចនេះអាម៉េរិកចង់ឱ្យគម្លាតនេះ មិនឱ្យមានច្រើន ឬមួយស្មើជាមួយប្រទេសមួយចំនួន។

បន្ថែមលើនេះ សម្តេចធិបតី ពន្យល់ថា ៩៧% មិនមែនព​ន្ធដែលរដ្ឋាភិបាលខ្មែរ ដាក់លើទំនិញ​ពីអាម៉េរិកនោះទេ ផ្ទុយទៅវិញ៩៧% គឺជាលម្អៀងនៃឱនភាពពាណិជ្ជកម្ម នៃការនាំចេញទៅអាម៉េរិក។

ជាមួយគ្នានេះ សម្តេចនាយករដ្ឋមន្ត្រី ពន្យល់បន្ថែមថា ការនាំចេញខោអាវ ផលិតនៅកម្ពុជា ទៅកាន់ប្រទេសអាម៉េរិក ក៏ព្រោះកម្ពុជា គឺមានពលក​ម្មតម្លៃសមរម្យ ហេតុដូចនេះ បានត្រូវមកបើកទីតាំងផលិតកម្មនៅកម្ពុជា​ ហើយទិញទៅវិញ ដែលនេះគឺជាពាណិជ្ជកម្ម ខណៈដែលអីវ៉ាន់នាំចេញពីកម្ពុជា គឺប្រភេទខោអាវច្រើន ។

ក្នុងនោះ សម្តេចធិបតី ហ៊ុន ម៉ាណែត មានប្រសាសន៍ថា «សំណួរមួយទៀតសួរថា តើដោយសារយើងនាំទៅអាម៉េរិកច្រើនជាង ហើយម៉េចក៏យើងមិនទិញ ពីអាម៉េរិកឱ្យស្មើគ្នា យើងនាំចេញ១៣០០លាន អាម៉េរិកចូល៣០០ យើង​ប្រទេសតូច ក្រីក្រគ្មានលទ្ធភាព ទៅយក១ពាន់លាន ទិញ  Boeing ១០គ្រឿងទេ ហើយបើឱ្យអាម៉េរិកឈប់ទិញពីយើង រហូតទៅដល់ត្រឹមទម្លាក់មកត្រឹម៣០០លាន បានន័យថា បិទរោងចក្រចោលច្រើនណាស់ ចឹងវាមានត្រូវតែគម្លាតហើយ រវាងប្រទេសអ្នកមានអ្នកក្រ ។ ប្រទេសអ្នកមាន មានលទ្ធភាពទិញធំជាងប្រទេសអ្នកក្រ សូម្បីតែ អឺរ៉ុប និងអាម៉េរិក ក៏ការនាំចេញនាំចូលខុសគ្នាច្រើនដែរ»។

ជាងនេះទៅទៀត សម្តេចធិបតី បានគូសបញ្ជាក់ថា បើឱ្យកម្ពុជា ធ្វើស្មើអាម៉េរិកលើពាណិជ្ជកម្មនាំចេញនាំចូលនេះ គឺទៅមិនរួចនោះទេ៕

ដោយ៖ គង់ សិរីរ័ត្ន, រូបថត៖ គល់ រ៉េននី