AKPកំពង់ធំថ្ងៃទី២៧ ខែមេសា ឆ្នាំ ២០២៥– ឯកឧត្តម នួន ផារ័ត្ន ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ធំនិងក្រុមការងារថ្នាក់ស្រុក ថ្នាក់ឃុំ ភូមិនាព្រឹកថ្ងៃទី២៧ខែមេសាឆ្នាំ២០២៥បានចុះសួរសុខទុក្ខនាំយកអំណោយមនុស្សធម៌របស់សាខាកាកបាទក្រហមកម្ពុជាខេត្តកំពង់ធំជូនដល់ប្រជាពលរដ្ឋនៅតាមខ្នងផ្ទះដែលខូចខាតចំនួន៦៣ខ្នងបណ្ដាលមកពីខ្យល់កន្ត្រាក់ប៉ះពាល់ដល់ភូមិចំនួន០៥ក្នុងឃុំចុងដូង ស្រុកបារាយណ៍ ខេត្តកំពង់ធំ។

សូមបញ្ជាក់ថាកាលពីវេលាម៉ោង១៥ និង៣០នាទី រសៀលថ្ងៃទី២៥ ខែមេសាឆ្នាំ២០២៥មានភ្លៀងនិងខ្យល់កន្ត្រាក់បានវាយប្រហារទៅលើតំបន់ឃុំចុងដូង បង្កឱ្យមានការខូចខាតរបើកដំបូលផ្ទះប្រជាពលរដ្ឋចំនួន៦៣ខ្នងក្នុងនោះខូចខាតអស់ទាំងស្រុងចំនួន១០ខ្នង នៅក្នុងភូមិចំនួន០៥គឺ ភូមិខ្សាច់ល្អិតខូចខាតចំនួន៤៦ខ្នង ភូមិគូខូចខាត០៣ខ្នង ភូមិចុងដូងខូចខាត០៥ខ្នង ភូមិទួលសាលាខូចខាតចំនួន០៥ខ្នង និងភូមិសំរោងខូចខាតចំនួន០៤ខ្នង។

ឯកឧត្តម នួន ផារ័ត្ន បានមានប្រសាសន៍ថា សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា តែងតែយកចិត្តទុកដាក់និងព្រួយបារម្ភអំពីសុខទុក្ខរបស់បងប្អូនប្រជាពលរដ្ឋ ដោយសម្តេចបានណែនាំឱ្យឯកឧត្តមមកជួបជាមួយបងប្អូនប្រជាពលរដ្ឋដោយផ្ទាល់ ដែលរងគ្រោះដោយភ្លៀងនិងខ្យល់កន្ត្រាក់"ទីណាមានទុក្ខលំបាកទីនោះមានកាកបាទក្រហមកម្ពុជា"ចុះជួយដល់មូលដ្ឋានជាមួយនឹងការសោកស្តាយលើការខូចខាតដែលបណ្តាលមកពីភ្លៀងនិងខ្យល់កន្ត្រាក់ដែលបានធ្វើឱ្យខូចខាតផ្ទះសម្បែងប្រជាពលរដ្ឋមានរបើកដំបូល និងរលំទាំងស្រុង។ឯកឧត្តមបានលើកទឹកចិត្តដល់គ្រួសារដែលរងគ្រោះដោយសារភ្លៀងនិងខ្យល់កន្ត្រាក់ឱ្យមានស្មារតីរឹងមាំនិងប្រកបមុខរបរបន្តទៀត ដើម្បីចិញ្ចឹមគ្រួសារឱ្យលក្ខណៈល្អប្រសើរ។

ឯកឧត្តម នួន ផារ័ត្ន បានផ្ដាំផ្ញើដល់បងប្អូនប្រជាពលរដ្ឋទាំងអស់ ពេលមានភ្លៀងផ្គរនិងខ្យល់កន្ត្រាក់ សូមមានការប្រុងប្រយ័ត្ន និងរកទីកន្លែងណាមានសុវត្ថិភាពដើម្បីកុំឱ្យប៉ះពាល់ដល់អាយុជីវិតមនុស្សសត្វ។

សូមបញ្ជាក់ថាគ្រួសារដែលរងគ្រោះដោយខ្យល់កន្ត្រាក់ទាំង៧៣គ្រួសារក្នុង០១គ្រួសារទទួលបាននូវអង្ករ០១បេ មី០១កេស ត្រីខ០១យួរ ទឹកស៊ីអ៊ីវ០១យួរ ទឹកត្រី០១យួរតង់០១និងថវិកាមួយចំនួនក្នុងនោះសម្រាប់គ្រួសារដែលរលំទាំងស្រុង២គ្រួសារទទួលបានថវិកា៤០ម៉ឺនរៀល គ្រួសារដែលប៉ះពាល់របើកដំបូលទាំងស្រុងទទួលបាន២០ម៉ីនរៀលនិងគ្រួសារដែលប៉ះពាល់របើកដំបូលទទួលបានថវិកា១០ម៉ឺនរៀល៕ 

ដោយ៖ ស៊ុម វណ្ណា