AKP ភ្នំពេញ ថ្ងៃទី២៥ ខែមេសា ឆ្នាំ២០២៥ -- យោងតាមក្រសួងទទួលបន្ទុកការគ្រប់គ្រងគ្រាអាសន្នរវ៉ាន់ដា បានឱ្យដឹងថា ប្រទេសរវ៉ាន់ដាបានទទួលអ្នកស្វែងរកសិទ្ធិជ្រកកោនចំនួន ១៣៧នាក់ដែលត្រូវបានជម្លៀសចេញពីប្រទេសលីប៊ី។

ក្រសួងបាននិយាយនៅក្នុងសេចក្តីថ្លែងការណ៍មួយថា ក្រុមអ្នកស្វែងរកសិទ្ធិជ្រកកោនចុងក្រោយបំផុតដែលនឹងមកដល់ប្រទេសរវ៉ាន់ដារួមមានក្រុមមកពីប្រទេសអេរីទ្រា អេត្យូពី និងស៊ូដង់ខាងត្បូង ប៉ុន្តែពួកគេភាគច្រើនមកពីប្រទេសស៊ូដង់។

អ្នកជម្លៀសនឹងត្រូវបានរៀបចំជាបណ្ដោះអាសន្ននៅមជ្ឈមណ្ឌលដឹកជញ្ជូន Gashora នៅភាគខាងកើតប្រទេសរវ៉ាន់ដាពីកន្លែងដែលពួកគេនឹងរង់ចាំដំណើរការផ្លាស់ប្តូរទីលំនៅទៅកាន់ប្រទេសផ្សេងទៀត។

ការជម្លៀសទៅកាន់ប្រទេសរវ៉ាន់ដាធ្វើឡើងក្រោមអនុស្សរណៈនៃការយោគយល់គ្នាឆ្នាំ២០១៩ ដែលប្រទេសរវ៉ាន់ដាបានចុះហត្ថលេខាជាមួយឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) និងសហភាពអាហ្រ្វិក ក្រោមយន្តការដឹកជញ្ជូនមួយត្រូវបានបង្កើតឡើងដើម្បីផ្តល់ការការពារសង្គ្រោះជីវិត ជំនួយ និងដំណោះស្រាយរយៈពេលវែងដល់បុគ្គលងាយរងគ្រោះដែលជាប់ក្នុងប្រទេសលីប៊ី។

ចាប់តាំងពីឆ្នាំ២០១៩ មក បុគ្គលចំនួន ២.៧៦០នាក់ត្រូវបានជម្លៀសចេញដោយមានជាង ២.១០០នាក់បានតាំងទីលំនៅថ្មីទៅកាន់ប្រទេសទីបីរួចហើយ។ នេះបើយោងតាមទិន្នន័យចុងក្រោយរបស់ UNHCR ៕

ដោយ៖ មូល មិនា (ប្រភព៖ ស៊ីនហួ)