AKP ភ្នំពេញ ថ្ងៃទី២៤ ខែមេសា ឆ្នាំ២០២៥ -- អនុប្រធានាធិបតីសហរដ្ឋអាមេរិក លោក ជេឌី វេនស៍ (JD Vance) បាននិយាយថា សហរដ្ឋអាមេរិកបានបង្កើតសំណើយ៉ាងច្បាស់លាស់ដើម្បីដោះស្រាយបញ្ហាជម្លោះអ៊ុយក្រែន ប៉ុន្តែនឹងសហរដ្ឋអាមេរិកដកខ្លួនចេញពីកិច្ចចរចា ប្រសិនបើទីក្រុងម៉ូស្គូ និងទីក្រុងគៀវ មិនយល់ព្រមចំពោះសំណើផែនការនេះ។

គេហទំព័រសារព័ត៌មាន​ Bloomberg បាន​ដក​ស្រង់​សម្ដីរបស់លោក​ដែលបាននិយាយ​ប្រាប់​អ្នកសារ​ព័ត៌មាន​បន្ទាប់​ពី​បញ្ចប់​ដំណើរទស្សនកិច្ច​នៅវិហារតាចម៉ាហាល់​( Taj Mahal) ថា​ «វា​ដល់​ពេលហើយ​ដែល​ពួកគេ​ត្រូវ​និយាយ​ថា​បាទ​ ឬបើពុំនោះទេ ​សហរដ្ឋ​អាមេរិកនឹង​ដើរ​ចេញ​ពី​ដំណើរការ​នេះ»។

លោក​បាននិយាយ​បន្ត​ថា «​វា​នឹង​ត្រូវ​មាន​ការ​ដោះដូរ​ទឹកដី​ខ្លះ​»​ ដើម្បី​បញ្ឈប់​ភាគី​ទាំង​សងខាង​ដោយត្រូវ​ដាក់​អាវុធ​ចុះ ធ្វើឱ្យស្ថានភាពស្ងប់ស្ងាត់ល្អ និង​បន្ត​អាជីវកម្ម​នៃ​ការ​កសាង​រុស្ស៊ី​ឱ្យ​កាន់តែ​ប្រសើរ ហើយ​អ៊ុយក្រែន​នឹងមានស្ថានភាព​ល្អ​ជាង​មុន​»​។ លោក វេនស៍ បាននិយាយថា លោកមានសុទិដ្ឋិនិយមចំពោះកិច្ចចរចា ដោយលោកមើលឃើញថា ភាគីទាំងអស់បានចរចាដោយស្មោះត្រង់រហូតមកដល់ពេលនេះ។

កាលពីថ្ងៃទី២០ ខែមេសា ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានសម្តែងក្តីសង្ឃឹមថា កិច្ចព្រមព្រៀងដោះស្រាយបញ្ហានៅអ៊ុយក្រែននឹងត្រូវបានសម្រេចនៅក្នុងសប្តាហ៍ខាងមុខនេះ។ ដូចដែលបានរាយការណ៍ដោយកាសែតញូវយ៉កប៉ុស្តិ៍ បានឱ្យដឹងថា ផែនការរបស់លោក ត្រាំ អាចរួមបញ្ចូលនូវការដាក់ពង្រាយកងទាហានអឺរ៉ុបនៅក្នុងទឹកដីដែលគ្រប់គ្រងដោយទីក្រុងគៀវ។ គួរបញ្ជាក់ផងដែរថា ការបង្កើតគណៈកម្មការរួមមួយកំពុងត្រូវបានពិចារណា ដែលនឹងរួមបញ្ចូលនូវអ្នកតំណាងរបស់រុស្ស៊ី អ៊ុយក្រែន និងប្រទេសទីបីដែលមិនមែនជាសមាជិកអង្គការណាតូ ដើម្បីត្រួតពិនិត្យបទឈប់បាញ់គ្នា៕

ដោយ៖ យា ចិន្ដាខន្ដី (ប្រភព៖ តាសស៍)