AKP ភ្នំពេញ ថ្ងៃទី២៣ ខែមេសា ឆ្នាំ២០២៥ -- រដ្ឋមន្ត្រីក្រសួងមហាផ្ទៃលោក អាលី យឺលីកាយ៉ា (Ali Yerlikaya) បានប្រកាសកាលពីថ្ងៃអង្គារថាប៉ូលិសតួកគីបានរឹបអូសថ្នាំញៀនប្រភេទមេតំហ្វេតាមីនចំនួន៨០១,៥គីឡូក្រាម និងឃាត់ខ្លួនជនសង្ស័យ ២នាក់ក្នុងអំឡុងពេលប្រតិបត្តិការដ៏ធំមួយនៅទីក្រុងអ៊ីស្តង់ប៊ុល។

នៅក្នុងសេចក្តីថ្លែងការណ៍មួយនៅលើវេទិកាប្រព័ន្ធផ្សព្វផ្សាយសង្គមអ៊ិច លោក យឺលីកាយ៉ា បាននិយាយថា ប្រតិបត្តិការនេះត្រូវបានធ្វើឡើងនៅក្នុងសង្កាត់អារណាវូតកុយ (Arnavutkoy) នៅតំបន់អឺរ៉ុបនៃទីក្រុង។

លោក​បន្ត​ថា ក្នុង​ការ​ឆ្មក់​ចូល​នោះ ប៉ូលិស​បាន​រឹប​អូស​បាន​ថ្នាំ​ញៀន​ប្រភេទ​មេតំហ្វេតាមីន​ទម្ងន់ ៧៧៣គីឡូក្រាមដែល​រក្សា​ទុក​ក្នុង​ធុង​ចំនួន២៩ផ្សេង​គ្នា រួម​នឹង​ថ្នាំ​ញៀន​ប្រភេទ​មេតំហ្វេតាមីន​គ្រីស្តាល់ចំនួន២៨,៥គីឡូក្រាម។

វីដេអូមួយដែលត្រូវបានបង្ហោះដោយលោក យឺលីកាយ៉ា នៅលើប្រព័ន្ធផ្សព្វផ្សាយសង្គមអ៊ិចបានបង្ហាញពីអង្គភាពប៉ូលីសអមដោយសត្វឆ្កែsniffer ដែលត្រូវបានបណ្តុះបណ្តាលយ៉ាងពិសេស បានឆ្មក់ចូលរថយន្តដឹកទំនិញនៅក្នុងចំណតរថយន្តមួយ។ ថ្នាំញៀន​មេ​តំ​ហ្វេ​តា​មីន​ត្រូវ​បាន​គេ​ប្រទះ​ឃើញ​លាក់​ទុក​ក្នុង​ទូ​ជាច្រើន​ក្នុង​រថយន្ត ។

កងកម្លាំងសន្តិសុខតួកគីជារឿយៗធ្វើប្រតិបត្តិការប្រឆាំងនឹងការប្រើប្រាស់គ្រឿងញៀន និងការជួញដូរដែលជាផ្នែកមួយនៃការប្រយុទ្ធប្រឆាំងនឹងគ្រឿងញៀនដ៏យូរអង្វែងរបស់ប្រទេសនេះ៕

ដោយ៖ មូល មិនា (ប្រភព៖ ស៊ីនហួ)