AKP ភ្នំពេញ ថ្ងៃទី២៣ ខែមេសា ឆ្នាំ២០២៥ -- រដ្ឋមន្ត្រីការបរទេសចិនលោក វ៉ាង យី (Wang Yi) បានជួបពិភាក្សាជាមួយរដ្ឋមន្ត្រីការបរទេសឥណ្ឌូនេស៊ី លោក ស៊ូជីអូណូ (Sugiono) នៅទីក្រុងប៉េកាំង។

លោក វ៉ាង ជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិនបាននិយាយថា ប្រទេសចិន និងឥណ្ឌូនេស៊ីបានឈានដល់ការឯកភាពដ៏សំខាន់មួយលើការកសាងសហគមន៍ចិន-ឥណ្ឌូនេស៊ី ជាមួយនឹងអនាគតរួមគ្នាដែលមានឥទ្ធិពលក្នុងតំបន់ និងពិភពលោក ហើយធ្វើឱ្យប្រសើរឡើងនូវគំរូកិច្ចសហប្រតិបត្តិការ «សសរស្តម្ភទាំងបួន» ដែលគ្របដណ្តប់លើផ្នែកនយោបាយ សេដ្ឋកិច្ច ការផ្លាស់ប្តូរប្រជាជន និងទិដ្ឋភាពនៃកិច្ចសហប្រតិបត្តិការលើដែនសមុទ្រដល់កិច្ចសហប្រតិបត្តិការ «សសរស្តម្ភទីប្រាំ» ជាមួយនឹងការបន្ថែមលើផ្នែកសន្តិសុខជាសសរស្តម្ភទីប្រាំ ដោយមានការរំពឹងទុកយ៉ាងទូលំទូលាយសម្រាប់កិច្ចសហប្រតិបត្តិការចិន-ឥណ្ឌូនេស៊ី។

លោកបានមានប្រសាសន៍ថា ភាគីទាំងពីរគួរតែពង្រឹងកិច្ចសហប្រតិបត្តិការប្រកបដោយគុណភាពខ្ពស់ លើកកម្ពស់ពាណិជ្ជកម្មសេរី ការអភិវឌ្ឍឧស្សាហកម្មដែលកំពុងរីកចម្រើន និងការពង្រីកភាពជាដៃគូដែលផ្តោតលើជីវភាពរស់នៅ។

ដោយកត់សម្គាល់ថា ប្រទេសចិនគឺជាដៃគូពាណិជ្ជកម្មដ៏ធំបំផុតរបស់ប្រទេសឥណ្ឌូនេស៊ី និងជាប្រភពនៃការវិនិយោគបរទេសដ៏សំខាន់នោះលោក ស៊ូជីអូណូ បាននិយាយថា ប្រទេសឥណ្ឌូនេស៊ីតែងតែចាត់ទុកប្រទេសនេះថាជាដៃគូដ៏សំខាន់បំផុតមួយរបស់ខ្លួន ហើយទំនាក់ទំនងទ្វេភាគីបានរក្សាសន្ទុះខ្លាំងក្នុងរយៈពេលប៉ុន្មានឆ្នាំកន្លងមកនេះ។

លោកបានបន្ថែមថា ប្រទេសឥណ្ឌូណេស៊ីទន្ទឹងរង់ចាំការបង្កើនការផ្លាស់ប្តូរជាមួយប្រទេសចិននៅគ្រប់កម្រិត និងពង្រីកកិច្ចសហប្រតិបត្តិការជាក់ស្តែងលើពាណិជ្ជកម្ម ការវិនិយោគ កសិកម្ម នេសាទ ការថែទាំសុខភាពថាមពលស្អាត ការច្នៃប្រឌិតវិទ្យាសាស្ត្រ ព្រមទាំងការផ្លាស់ប្ដូរវប្បធម៌រវាងប្រជាជន និងប្រជាជន។ ប្រទេសឥណ្ឌូណេស៊ីក៏ទន្ទឹងរង់ចាំបន្តពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយរបស់ខ្លួនជាមួយប្រទេសចិន និងជំរុញការអភិវឌ្ឍក្នុងតំបន់ប្រកបដោយភាពស្វាហាប់ រឹងមាំ និងវិបុលភាព៕

ដោយ៖ មូល មិនា (ប្រភព៖ ភីបផលដេលី)