AKP ភ្នំពេញ ថ្ងៃទី២៣ ខែមេសា ឆ្នាំ២០២៥ -- យោងតាមសមាគមអ្នកនាំចេញអង្ករថៃបានឱ្យដឹងថា ការនាំចេញអង្កររបស់ប្រទេសថៃបានធ្លាក់ចុះ៣០% នៅក្នុងត្រីមាសទីមួយនៃឆ្នាំនេះ ដែលមានចំនួនត្រឹម ២,១លានតោនប៉ុណ្ណោះ។

ប្រធានកិត្តិយសរបស់សមាគមនោះ លោក ជូគៀត អូផាសាវង្សសេ (Chookiat Ophaswongse) បាននិយាយថា ការធ្លាក់ចុះនេះគឺដោយសារតែប្រទេសនានាពន្យារពេលការសម្រេចចិត្តទិញ ហើយឥណ្ឌាបន្តការនាំចេញអង្ករឡើងវិញ។

លោកបានកត់សម្គាល់ថា ការនាំចេញពេញមួយឆ្នាំរបស់ប្រទេសថៃអាចធ្លាក់ចុះក្រោមការព្យាករទុកចំនួន ៧,៥លានតោន ប៉ុន្តែអ្នកនាំចេញកំពុងមើលឃើញនូវការបញ្ជាទិញរបស់សហរដ្ឋអាមេរិកបន្ថែមទៀត បន្ទាប់ពីការផ្អាករយៈពេល ៩០ថ្ងៃទៅលើការដាក់ពន្ធថ្មីដែលកំពុងតែមានការចាប់អារម្មណ៍។

លោក ជូគៀត បានព្យាករណ៍ថា ការនាំចេញអង្ករនៅក្នុងត្រីមាសទីពីរនឹងមានភាពស្រដៀងគ្នានឹងរយៈពេលបីខែដំបូងនៃឆ្នាំនេះដែរ។

លោក ជូគៀត បាន​និយាយ​ថា ប្រទេស​ថៃ​ជា​ប្រទេស​នាំ​ចេញ​អង្ករ​ធំ​ជាង​គេលំដាប់​ទី​ពីរ​របស់​ពិភពលោក ប៉ុន្តែ​អាច​នឹង​បាត់​បង់តំណែងនេះ​ប្រសិន​បើ​ពន្ធ​ខ្ពស់​ជាង ១០%។

គណៈប្រតិភូដែលដឹកនាំដោយរដ្ឋមន្ត្រីក្រសួងហិរញ្ញវត្ថុថៃ លោក ពីឆៃ ជុនហាវ៉ាជីរ៉ា (Pichai Chunhavajira) នឹងជួបជាមួយមន្ត្រីសហរដ្ឋអាមេរិកនៅទីក្រុងវ៉ាស៊ីនតោននៅក្នុងសប្តាហ៍នេះ ដើម្បីចរចាបន្ទាបពន្ធ។

កាលពីឆ្នាំមុន ប្រទេសថៃបាននាំចេញអង្ករចំនួន ៩,៩៤លានតោនដែលមានតម្លៃ ២២៥,៦៥ពាន់លានបាត (៦,៧ពាន់លានដុល្លារអាម៉េរិក) ដោយសហរដ្ឋអាមេរិកជាទីផ្សារធំលំដាប់ទីបីរបស់ខ្លួនតាមរយៈបរិមាណការបញ្ជាទិញ៕

ដោយ៖ យា ចិន្ដាខន្ដី (ប្រភព៖ VNA)