EN 
FR 
AR
CNទុយនីស៊ីបំបែកបណ្តាញជួញដូរគ្រឿងញៀន និងចាប់ខ្លួនមនុស្ស ៦នាក់
AKP ភ្នំពេញ ថ្ងៃទី២២ ខែមេសា ឆ្នាំ២០២៥ -- ឆ្មាំជាតិទុយនីស៊ីបាននិយាយកាលពីថ្ងៃចន្ទនៅលើទំព័រហ្វេសប៊ុករបស់ខ្លួនថា កងកម្លាំងសន្តិសុខទុយនីស៊ីបានបំបែកបណ្តាញជួញដូរគ្រឿងញៀនដែលសកម្មនៅក្នុងខេត្តហ្គាហ្វសា ភាគនិរតីនៃប្រទេសទុយនីស៊ី ដោយបានចាប់ខ្លួនមនុស្សចំនួន ៦នាក់។
អង្គភាពសន្តិសុខមកពីកងពលតូចនគរបាលយុត្តិធម៌ក្នុងទីក្រុងMetlaoui បានចាប់ខ្លួនមនុស្ស ៦នាក់ពាក់ព័ន្ធនឹងប្រតិបត្តិការជួញដូរគ្រឿងញៀនមួយគោលដៅ។ ប្រតិបត្តិការនេះបានធ្វើឡើងបន្ទាប់ពីសមត្ថកិច្ចចាប់បានជនសង្ស័យម្នាក់ពាក់ព័ន្ធនឹងការចែកចាយគ្រឿងញៀន។ ក្រោយការស៊ើបអង្កេតជាបន្តបន្ទាប់ សមត្ថកិច្ចអាចកំណត់អត្តសញ្ញាណមនុស្សទាំងនោះ និងកំណត់ទីតាំងស្នាក់នៅ ។
ដោយមានការសម្របសម្រួលជាមួយអយ្យការ ប៉ូលីសបានឆ្មក់ចូលផ្ទះរបស់ជនសង្ស័យ ដែលជាកន្លែងចាប់ខ្លួន រួមនឹងមនុស្ស ៥នាក់ផ្សេងទៀត។ក្នុងការឆែកឆេរនោះ សមត្ថកិច្ចបានដកហូតថ្នាំញៀនចំនួន ៤៥កញ្ចប់ ថង់ប្លាស្ទិកចំនួន ៩ កញ្ចប់ថ្នាំញៀនប្រភេទហេរ៉ូអ៊ីន និងឧបករណ៍ស្រួចមួយចំនួន ។
សេចក្តីថ្លែងការណ៍មិនបានបញ្ជាក់ពីពេលវេលាជាក់លាក់នៃប្រតិបត្តិការ ឬបង្ហាញអត្តសញ្ញាណជនសង្ស័យឡើយ។ អយ្យការសាធារណៈបានអនុញ្ញាតឱ្យឃុំខ្លួនជនសង្ស័យដែលកំពុងរង់ចាំការស៊ើបអង្កេត។
រដ្ឋាភិបាលទុយនីស៊ីបានប្រកាន់ជំហររឹងមាំប្រឆាំងនឹងការជួញដូរគ្រឿងញៀន ដោយបានចាប់ខ្លួនមនុស្សរាប់រយនាក់ដែលជាប់ពាក់ព័ន្ធក្នុងឧក្រិដ្ឋកម្មអំឡុងពេលប្រតិបត្តិការទូទាំងប្រទេសនាពេលថ្មីៗនេះ៕
ដោយ៖ មូល មិនា (ប្រភព៖ ស៊ីនហួ)
