AKP ភ្នំពេញ ថ្ងៃទី២២ ខែមេសា ឆ្នាំ២០២៥ -- ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន (UNRWA) បាននិយាយកាលពីថ្ងៃចន្ទថា កុមារប្រមាណជិត ៦០០នាក់ត្រូវបានសម្លាប់នៅក្នុងការវាយប្រហាររបស់អ៊ីស្រាអែលនៅតំបន់ហ្គាហ្សាស្ទ្រីបចាប់តាំងពីខែមុនមក។

ដោយលើកឡើងពីតួលេខដែលបានចេញផ្សាយដោយទីភ្នាក់ងារកុមាររបស់អង្គការសហប្រជាជាតិ (UNICEF) នេះ ទីភ្នាក់ងារ UNRWA បាននិយាយថា កុមារជាង ១.៦០០នាក់ផ្សេងទៀតក៏បានរងរបួសផងដែរចាប់តាំងពីអ៊ីស្រាអែលបានបន្តការវាយប្រហាររបស់ខ្លួនឡើងវិញនៅថ្ងៃទី១៨ខែមីនា។

ទីភ្នាក់ងារនោះបាននិយាយបន្ថែមថា «វិបត្តិមនុស្សធម៌នៅតំបន់ហ្គាហ្សាស្ទ្រីបនាពេលឥឡូវនេះ ទំនងជាស្ថិតក្នុងចំណុចអាក្រក់បំផុតចាប់តាំងពីខែតុលា ឆ្នាំ២០២៣ មក»។

កងទ័ពអ៊ីស្រាអែលបានបន្តការវាយលុកដ៏សាហាវរបស់ខ្លួននៅលើតំបន់ហ្គាហ្សាស្ទ្រីបនៅថ្ងៃទី១៨ ខែមីនា ហើយចាប់តាំងពីពេលនោះមកបានសម្លាប់មនុស្សចំនួន ១.៨៦៤នាក់ និងប្រមាណជិត ៤.៩០០នាក់ផ្សេងទៀតបានរងរបួស បើទោះបីជាមានកិច្ចព្រមព្រៀងបទឈប់បាញ់គ្នានិងការផ្លាស់ប្តូរអ្នកទោសដែលបានធ្វើឡើងនៅក្នុងខែមករាក៏ដោយ។

ជនជាតិប៉ាឡេស្ទីនជាង ៥១.២០០នាក់ត្រូវបានសម្លាប់នៅតំបន់ហ្គាហ្សាដោយសារការវាយលុកដ៏ឃោរឃៅរបស់អ៊ីស្រាអែលចាប់តាំងពីខែតុលាឆ្នាំ២០២៣ ដែលភាគច្រើនជាស្ត្រី និងកុមារ។

កាលពីខែវិច្ឆិកា ឆ្នាំមុន តុលាការឧក្រិដ្ឋកម្មអន្តរជាតិបានចេញដីកាចាប់ខ្លួននាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ(Benjamin Netanyahu) និងអតីតរដ្ឋមន្ត្រីការពារជាតិអ៊ីស្រាអែល លោក យ៉ាវ ហ្កាល់លេនត៍ (Yoav Gallant) ពីបទឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិនៅក្នុងតំបន់ហ្គាហ្សា។

អ៊ីស្រាអែល​ក៏​ប្រឈមមុខ​នឹង​សំណុំរឿង​ប្រល័យពូជសាសន៍​នៅ​តុលាការ​យុត្តិធម៌​អន្តរជាតិ​សម្រាប់​សង្រ្គាម​នៅ​ក្នុង​តំបន់ជុំវិញផងដែរ៕

ដោយ៖ យា ចិន្ដាខន្ដី (ប្រភព៖ AA-AKP)