AKP ភ្នំពេញ ថ្ងៃទី២២ ខែមេសា ឆ្នាំ២០២៥ -- សម្តេចប៉ាប ហ្វ្រង់ស៊ីស(Francis) បានទទួលមរណភាពហើយក្នុងជន្មាយុ ៨៨ឆ្នាំ បន្ទាប់ពីមានជំងឺរ៉ាំរ៉ៃ។

សម្តេចបានទទួលរងនូវវិបត្តិផ្លូវដង្ហើម ដូចជាជំងឺហឺតរយៈពេលយូរដែលទាក់ទងនឹងជំងឺឈាមក្រកាក (កង្វះបា្លកែត)។ នេះបើយោងតាមសេចក្តីថ្លែងការណ៍របស់បុរីវ៉ាទីកង់។

សម្តេចប៉ាប ហ្រ្វង់ស៊ីស កើតនៅទីក្រុងប៊ូណូស អ៊ែរ៉េស នៅថ្ងៃទី១៧ខែធ្នូ ឆ្នាំ១៩៣៦ ដែលមានឪពុកម្តាយជាជនអន្តោប្រវេសន៍អ៊ីតាលី។

សម្តេចបានសិក្សានៅប្រទេសអាហ្សង់ទីន និងក្រោយមកនៅប្រទេសអាល្លឺម៉ង់ មុនពេលត្រូវបានតែងតាំងជាបូជាចារ្យ Jesuit ក្នុងឆ្នាំ១៩៦៩។

ក្នុង​រយៈពេល​មួយ​ទសវត្សរ៍​នៃ​ការ​ឡើង​កាន់​តំណែង​របស់​សម្តេច​ប៉ាបហ្រ្វង់ស៊ីស សម្តេចទទួលបានទាំងការ​កោតសរសើរ និង​ភាពចម្រូងចម្រាសមួយចំនួន។

សម្តេច​បាន​ធ្វើ​កំណែទម្រង់​ការិយាធិបតេយ្យ​របស់​បុរីវ៉ាទីកង់ដោះស្រាយ​បញ្ហា​ពុករលួយ និង​ដោះស្រាយ​បញ្ហា​ប្រឈម​សំខាន់ៗ​មួយចំនួន​របស់​អាណាចក្រសាសនាមួយនេះ។

ខណៈដែលសម្តេចត្រូវបានសាទរចំពោះភាពមនុស្សធម៌ និងការប្តេជ្ញាចិត្តរបស់សម្តេចចំពោះយុត្តិធម៌សង្គមនោះ ភាពជាអ្នកដឹកនាំរបស់សម្តេចក៏បានទាក់ទាញការតស៊ូយ៉ាងខ្លាំងពីអ្នកអភិរក្សនៅក្នុងអាណាចក្រសាសនា និងលើសពីនេះផងដែរ៕

ដោយ៖ យា ចិន្ដាខន្ដី (ប្រភព៖ AA-AKP)