AKP ភ្នំពេញ ថ្ងៃទី២១ ខែមេសា ឆ្នាំ២០២៥ -- ទីភ្នាក់ងារព័ត៌មាន Bloomberg បាននិយាយថា មូលនិធិរូបិយវត្ថុអន្តរជាតិ (IMF) អាចនឹងពិនិត្យឡើងវិញនូវការព្យាករកំណើនសេដ្ឋកិច្ចពិភពលោកដែលនឹងមានការធ្លាក់ចុះ ដោយសារតែពន្ធពាណិជ្ជកម្មដែលត្រូវបានដាក់ចេញដោយរដ្ឋបាលសហរដ្ឋអាមេរិក។

សេដ្ឋកិច្ចពិភពលោកត្រូវបានគេរំពឹងថានឹងជួបប្រទះនឹងរលកឆក់ដំបូងដែលបង្កឡើងដោយគោលនយោបាយពន្ធរបស់ទីក្រុងវ៉ាស៊ីនតោនក្នុងពេលឆាប់ៗនេះ។ ទីភ្នាក់ងារសារព័ត៌មាននោះបាននិយាយថា ដូច្នេះហើយ IMF អាចនឹងប្រកាសពីការថយចុះនៃការព្យាករពិភពលោកនៅថ្ងៃអង្គារស្អែកនេះ។

នៅក្នុងបទសម្ភាសន៍មួយតាមអនឡាញជាមួយសារព័ត៌មានរ៉យទ័រស៍ នាយកគ្រប់គ្រងមូលនិធិ IMF លោកស្រី គ្រីស្តាលីណា ចចជីវ៉ា (Kristalina Georgieva) បានសន្មត់ថា ការពិនិត្យមើលឡើងវិញនៃការធ្លាក់ចុះការព្យាករសម្រាប់កំណើនសេដ្ឋកិច្ចពិភពលោកដោយសារតែពន្ធរបស់សហរដ្ឋអាមេរិក។ លោកស្រីបាននិយាយថា ពន្ធគយនេះបង្កើតនូវភាពមិនច្បាស់លាស់ខ្លាំង និងធ្វើឱ្យប៉ះពាល់ដល់ទំនុកចិត្ត។ លោកស្រី ចចជីវ៉ា បានកត់សម្គាល់ថា រយៈពេលកាន់តែយូរនឹងក្លាយជាភាពមិនច្បាស់លាស់កាន់តែខ្លាំងដែលនឹងមានឥទ្ធិពលចំពោះកំណើនសេដ្ឋកិច្ចពិភពលោក៕

ដោយ៖ យា ចិន្ដាខន្ដី (ប្រភព៖ តាសស៍)