AKP ភ្នំពេញ ថ្ងៃទី១៨ ខែមេសា ឆ្នាំ២០២៥ -- ទូរទស្សន៍ Houthi-run al-Masirah TV បានរាយការណ៍នៅថ្ងៃសុក្រនេះថា ការវាយប្រហារតាមអាកាសរបស់សហរដ្ឋអាមេរិកទៅលើកំពង់ផែឥន្ធនៈរបស់យេម៉ែននៃតំបន់ Ras Isa កាលពីថ្ងៃព្រហស្បតិ៍បានសម្លាប់មនុស្ស ១៧នាក់ និងរាប់សិបនាក់ទៀតរងរបួស។

ទូរទស្សន៍នេះ​បាន​និយាយ​ថា ជនរងគ្រោះ​គឺជា​កម្មករ និង​ជា​បុគ្គលិក​កំពង់ផែ។ ក្រុម​ការពារ​ជន​ស៊ីវិល និង​សង្គ្រោះ​កំពុង​ធ្វើ​ការ​​នៅតំបន់​ Ras Isa ហើយ​យក​អ្នក​របួស​ទៅកាន់​មន្ទីរពេទ្យ។

កន្លងមក ទីបញ្ជាការកណ្តាលរបស់សហរដ្ឋអាមេរិក(USCENTCOM) បាននិយាយនៅក្នុងសេចក្តីថ្លែងការណ៍មួយថា ខ្លួនបានវាយប្រហារ និងបំផ្លាញតំបន់ Ras Isa កាលពីថ្ងៃព្រហស្បតិ៍ «ដើម្បីលុបបំបាត់ប្រភពនៃប្រេងឥន្ធនៈ និង បង្ខូចប្រភពសេដ្ឋកិច្ចនៃអំណាច» របស់ក្រុមហ៊ូធី។

មន្ត្រីរដ្ឋាភិបាលក្នុងតំបន់របស់ប្រទេសយេម៉ែនបានប្រាប់សារព័ត៌មានស៊ីនហួថា ការវាយប្រហារច្រើនជាងប្រាំដងបានវាយប្រហារកំពង់ផែនេះហើយបានបំផ្លាញវាដោយផ្នែក។

កាលពីពាក់កណ្តាលខែមីនា ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានបញ្ជាឱ្យយោធាអាមេរិក ចាប់ផ្តើម«សកម្មភាពយោធាដ៏ម៉ឺងម៉ាត់ និងខ្លាំងក្លា» ប្រឆាំងនឹងក្រុមហ៊ូធី បន្ទាប់ពីអ្នកទាំងនោះបានប្រកាសពីផែនការរបស់ពួកគេក្នុងការបន្តការវាយប្រហារលើនាវាអ៊ីស្រាអែលនៅសមុទ្រក្រហម ដោយលើកឡើងពីការបិទជំនួយរបស់អ៊ីស្រាអែលទៅកាន់តំបន់ហ្គាហ្សា៕

ដោយ៖ មូល មិនា (ប្រភព៖ ស៊ីនហួ)