AKP ភ្នំពេញ ថ្ងៃទី១៨ ខែមេសា ឆ្នាំ២០២៥ -- ម៉ាឡេស៊ី និងចិន បានចុះហត្ថលេខាលើកិច្ចព្រមព្រៀងមួយចំនួនដើម្បីបង្កើនកិច្ចសហប្រតិបត្តិការរវាងប្រទេសទាំងពីរឱ្យកាន់តែស៊ីជម្រៅ ក្នុងអំឡុងពេលនៃដំណើរទស្សនកិច្ចរបស់ប្រធានាធិបតីចិន លោក ស៊ី ជីនពីង (Xi Jinping) ទៅកាន់ប្រទេសម៉ាឡេស៊ីកាលពីពេលថ្មីៗនេះ ចំពេលដែលទីក្រុងប៉េកាំងកំពុងមានសង្គ្រាមពាណិជ្ជកម្មជាមួយទីក្រុងវ៉ាស៊ីនតោនឌីស៊ី។

ប្រទេសម៉ាឡេស៊ី គឺជាប្រទេសទីពីរសម្រាប់ដំណើរទស្សនកិច្ចបីប្រទេសនៅតំបន់អាស៊ីអាគ្នេយ៍របស់លោក ស៊ី ជីនពីង ដែលរួមមានប្រទេសវៀតណាម និងកម្ពុជាផងដែរ។ ក្នុងអំឡុងពេលនៃដំណើរទស្សនកិច្ចផ្លូវរដ្ឋរយៈពេលបីថ្ងៃទៅកាន់ប្រទេសម៉ាឡេស៊ី តបតាមការអញ្ជើញរបស់ស្តេចស៊ុលតង់ អ៊ីប្រាហ៊ីម (Sultan Ibrahim) នោះ លោក ស៊ីបានបង្ហាញពីយុគសម័យមាសថ្មីនៃទំនាក់ទំនងចិន-ម៉ាឡេស៊ី បន្ទាប់ពីខួបលើកទី៥០ នៃទំនាក់ទំនងការទូតកាលពីឆ្នាំមុន។ ស្តេចស៊ុលតង់បានប្រកាសអំពីកិច្ចសហប្រតិបត្តិការថ្មីរវាងប្រទេសទាំងពីរក្នុងវិស័យផ្សេងៗ ដែលរួមមានទាំងបញ្ញាសិប្បនិមិ្មត (AI) ផងដែរ។

រដ្ឋមន្ត្រីក្រសួងទំនាក់ទំនងរបស់ម៉ាឡេស៊ី លោក ហ្វាមី ហ្វាដហ្ស៊ីល (Fahmi Fadzil) បាននិយាយថា អនុស្សរណៈនៃការយោគយល់គ្នាសរុបចំនួន៣១ (MoU) ត្រូវបានចុះហត្ថលេខាដោយមេដឹកនាំទាំងពីរក្នុងអំឡុងពេលនៃដំណើរទស្សនកិច្ចនោះ ដែលលោកបានហៅថា «នេះជាសមិទ្ធផលសំខាន់ៗបំផុតនៅក្នុងប្រវត្តិសាស្ត្ររបស់យើង»។

សេចក្តីថ្លែងការណ៍រួមមួយដែលបានចេញផ្សាយនៅចុងបញ្ចប់នៃដំណើរទស្សនកិច្ចផ្លូវរដ្ឋរបស់លោក ស៊ី ជីនពីង នោះ បាននិយាយថា ភាគីទាំងពីរបានព្រមព្រៀងគ្នាក្នុងការកសាងសហគមន៍យុទ្ធសាស្រ្តកម្រិតខ្ពស់ចិន-ម៉ាឡេស៊ីជាមួយនឹងអនាគតរួមគ្នា ដើម្បីពន្លឿនកិច្ចខិតខំប្រឹងប្រែងទំនើបកម្ម និងរួមគ្នាលើកកម្ពស់វិបុលភាព និងស្ថិរភាពក្នុងតំបន់ និងពិភពលោក៕

ដោយ៖ យា ចិន្ដាខន្ដី (ប្រភព៖ ANI)