EN 
FR 
AR
CNអង្គការសហប្រជាជាតិ៖ មនុស្សចំនួន ៥០០.០០០នាក់ត្រូវភៀសខ្លួននៅតំបន់ហ្គាហ្សា បន្ទាប់ពីអ៊ីស្រាអែលចាប់ផ្តើមការវាយប្រហារឡើងវិញ
AKP ភ្នំពេញ ថ្ងៃទី១៨ ខែមេសា ឆ្នាំ២០២៥ -- ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌(OCHA) បាននិយាយកាលពីថ្ងៃពុធថា ជនជាតិប៉ាឡេស្ទីនប្រមាណ៥០០.០០០នាក់ត្រូវបានផ្លាស់ទីលំនៅនៅក្នុងតំបន់ហ្គាហ្សា ចាប់តាំងពីអ៊ីស្រាអែលបានចាប់ផ្តើមការវាយលុកឡើងវិញបន្ទាប់ពីការបំបែកបទឈប់បាញ់គ្នាជាមួយក្រុមហាម៉ាស់។
កងទ័ពអ៊ីស្រាអែលបានបន្តការវាយប្រហារសារជាថ្មីរបស់ខ្លួនទៅលើតំបន់ហ្គាហ្សានៅថ្ងៃទី១៨ ខែមីនា ដោយបានបំបែកបទឈប់បាញ់គ្នាដែលបានធ្វើឡើងកាលពីថ្ងៃទី១៩ ខែមករា និងកិច្ចព្រមព្រៀងផ្លាស់ប្តូរអ្នកទោស។
ប្រជាជនប៉ាឡេស្ទីនប្រមាណជិត ៥១.០០០នាក់ត្រូវបានសម្លាប់នៅតំបន់ហ្គាហ្សានៅក្នុងការវាយលុកដ៏ឃោរឃៅរបស់អ៊ីស្រាអែលចាប់តាំងពីខែតុលា ឆ្នាំ២០២៣ មក ដែលភាគច្រើនជាស្ត្រី និងកុមារ។
តុលាការឧក្រិដ្ឋកម្មអន្តរជាតិ កាលពីខែវិច្ឆិកាឆ្នាំមុន បានចេញដីកាចាប់ខ្លួននាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ(Benjamin Netanyahu) និងអតីតរដ្ឋមន្ត្រីការពារជាតិអ៊ីស្រាអែល លោក យ៉ាវ ហ្គាល់លេនត៍ (Yoav Gallant) ពីបទឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិនៅក្នុងតំបន់ហ្គាហ្សា។
អ៊ីស្រាអែលក៏ប្រឈមមុខនឹងសំណុំរឿងប្រល័យពូជសាសន៍នៅតុលាការយុត្តិធម៌អន្តរជាតិសម្រាប់សង្រ្គាមនៅក្នុងតំបន់ជុំវិញផងដែរ៕
ដោយ៖ យា ចិន្ដាខន្ដី (ប្រភព៖ AA-AKP)
