AKP ភ្នំពេញ ថ្ងៃទី១៧ ខែមេសា ឆ្នាំ២០២៥ -- ប្រជាជនសិង្ហបុរីនឹងធ្វើដំណើរទៅបោះឆ្នោតនៅថ្ងៃទី០៣ ខែឧសភាខាងមុខ សម្រាប់ការបោះឆ្នោតជាសកលលើកទី១៤ របស់ប្រទេសសិង្ហបុរី។

ការ​ប្រកាស​នេះ​ត្រូវ​បាន​ធ្វើ​ឡើង​បន្ទាប់​ពី​ប្រធានាធិបតីសិង្ហបុរី លោក ថាមេន ស្សេនមូការ៉ាតនេម (Tharman Shanmugaratnam) បាន​រំលាយ​សភា​កាលពីថ្ងៃ​ទី១៥ ខែ​មេសា។

ថ្ងៃតែងតាំងបេក្ខភាពនឹងប្រព្រឹត្តទៅនៅថ្ងៃទី២៣ ខែមេសា ដោយផ្តល់ឱ្យនូវបេក្ខភាពទាំងនោះចំនួន ០៩ថ្ងៃដើម្បីធ្វើយុទ្ធនាការឃោសនាបោះឆ្នោតនៅមុន «ថ្ងៃ ស» គឺថ្ងៃទី០២ ខែឧសភា មួយថ្ងៃមុនថ្ងៃបោះឆ្នោត ដែលអនុញ្ញាតឱ្យអ្នកបោះឆ្នោតមានពេលវេលាដើម្បីឆ្លុះបញ្ចាំង និងពិចារណាទៅលើបញ្ហាសំខាន់ៗមុនពេលធ្វើការសម្រេចចិត្តរបស់ពួកគេ។

នាយកដ្ឋានរៀបចំការបោះឆ្នោតបាននិយាយនៅក្នុងសេចក្តីប្រកាសព័ត៌មានមួយកាលពីថ្ងៃទី១៥ ខែមេសា ថា «យោងតាមច្បាប់ ថ្ងៃបោះឆ្នោតនៅក្នុងការបោះឆ្នោតជាសកលទាំងអស់ គឺជាថ្ងៃឈប់សម្រាកសាធារណៈ។នៅថ្ងៃបោះឆ្នោតនោះ និយោជកគ្រប់រូបត្រូវអនុញ្ញាតឱ្យអ្នកដែលមានសិទ្ធិបោះឆ្នោតទាំងអស់ដែលធ្វើការងារ​​ឱ្យខ្លួន មានពេលវេលាសមស្របក្នុងការទៅចូលរួមបោះឆ្នោត»។

គណបក្សសកម្មភាពប្រជាជនដែលកំពុងកាន់អំណាច (PAP) ត្រូវបានគេរំពឹងថានឹងត្រូវបានប្រកួតប្រជែងសម្រាប់អាសនៈសភាទាំងអស់ចំនួន៩៧នៅទូទាំង ៣៣មណ្ឌល ដែលរួមមាន ១៨មណ្ឌលតំណាងក្រុម (GRC) និង១៥មណ្ឌលសម្រាប់សមាជិកតែមួយ (SMC)។

ការ​បោះឆ្នោត​ខាង​មុខ​អាច​មាន​បេក្ខភាព​មក​ពី​គណបក្ស​ចំនួន១១ដោយក្នុង​នោះ​មាន​សម្ព័ន្ធ​បក្ស​ប្រឆាំងចំនួន២។

នៅក្នុងការបោះឆ្នោតជាសកលឆ្នាំ២០២០ ដែលត្រូវបានរៀបចំធ្វើឡើងចំពេលមានការរាតត្បាតជំងឺកូវីដ-១៩ គណបក្ស PAP ទទួលបានសំឡេងគាំទ្រ ៦១,២៤% ដោយឈ្នះបាន ៨៣អាសនៈក្នុងចំណោម ៩៣អាសនៈ៕

ដោយ៖ យា ចិន្ដាខន្ដី (ប្រភព៖ VNA)