AKP ភ្នំពេញ ថ្ងៃទី១១ ខែមេសា ឆ្នាំ២០២៥-- 

លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានជួបសំណេះសំណាល និងប្រគល់ថវិកាមួយចំនួនជូនលោកជំទាវ នង ធួក អនុរដ្ឋលេខាធិការក្រសួងព័ត៌មាន តំណាងគណៈកម្មការមហោស្រពតន្ត្រី និងចម្រៀងកុមារនៃក្រសួងព័ត៌មាន នៅទីស្នាក់ការកណ្តាលកាកបាទក្រហមកម្ពុជា នាព្រឹកថ្ងៃសុក្រ ទី១១ ខែមេសា ឆ្នាំ២០២៥។

ក្នុងឱកាសនោះ លោកជំទាវអគ្គលេខាធិការបាននាំព្រះរាជបន្ទូលសួរសុខទុក្ខរបស់សម្តេចព្រះមហាក្សត្រី នរោត្តម មុនិនាថ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានកោតសរសើរ និងថ្លែងអំណរគុណចំពោះទូរទស្សន៍ជាតិកម្ពុជា បានជួយផ្សាយពីសកម្មភាពមនុស្សធម៌របស់កាកបាទក្រហមកម្ពុជាច្រើនដោយមិនគិតពីប្រាក់កម្រៃ និងមិនគិតពីការនឿយហត់ឡើយ។

ជាមួយគ្នានេះដែរ លោកជំទាវ នង ធួក បានថ្លែងអំណរគុណចំពោះកាកបាទក្រហមកម្ពុជា ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែយកចិត្តទុកដាក់ និងឧបត្ថម្ភគាំទ្រដល់ទូរទស្សន៍ជាតិកម្ពុជាគ្រប់ពេលវេលា ហើយនាំយកថវិកាទាំងនេះជូនគណៈកម្មការរៀបចំមហោស្រពតន្ត្រី និងចម្រៀងកុមារ និងសូមជូនពរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរដែលឈានមកដល់ក្នុងពេលខាងមុខនេះ សូមជួបតែពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)