AKP កំពង់ធំ ថ្ងៃទី១១ ខែមេសា ឆ្នាំ២០២៥-- 

លោកស្រី លំ គន្ធារី អភិបាលរងខេត្ត និងជាអនុប្រធានកាកបាទក្រហមខេត្តកំពង់ធំ និងក្រុមការងារ អមដំណើរដោយរដ្ឋបាលឃុំ មណ្ឌលសុខភាព នាព្រឹកថ្ងៃទី១១ ខែមេសា ឆ្នាំ២០២៥ បាននាំយកអំណោយមនុស្សធម៌របស់សាខាកាកបាទក្រហមកម្ពុជាខេត្តកំពង់ធំប្រគល់ជូនគ្រួសារសពឈ្មោះហ៊ុ ផល្លិះ អាយុ២៩ឆ្នាំ ភេទស្រី ដែលរងគ្រោះដោយរន្ទះបាញ់ បណ្ដាលឱ្យស្លាប់នៅនឹងកន្លែងកាលពីរសៀលថ្ងៃទី១០ ខែមេសា ឆ្នាំ២០២៥ នៅចំការស្វាយចន្ទីតំបន់អូក្រចូញ ភូមិសាគ្រាមត្បូង ឃុំសាគ្រាម ស្រុកប្រាសាទបល្ល័ង្ក ខេត្តកំពង់ធំ។

លោក ចាន់ សុផល មេឃុំសាគ្រាម បានបញ្ជាក់ថា ជនរងគ្រោះមានទីលំនៅភូមិសាគ្រាមជើង ឃុំសាគ្រាម ស្រុកប្រាសាទបល្ល័ង្ក ខេត្តកំពង់ធំ ដោយមានប្ដីឈ្មោះអឿង ណាង ភេទប្រុស អាយុ ២៨ឆ្នាំ និងកូនស្រីឈ្មោះ ណាង កន្និកា អាយុ១៨ខែ។

លោកស្រី លំ គន្ធារី បានថ្លែងនូវការសោកស្ដាយ និងសូមចូលរួមមរណទុក្ខយ៉ាងក្រៀមក្រំជាទីបំផុត ជាមួយគ្រួសារនៃសពដែលរងគ្រោះដោយរន្ទះបាញ់ និងបានលើកទឹកចិត្តដល់គ្រួសារសពត្រូវតែតាំងចិត្តឱ្យបានរឹងមាំ ដើម្បីចិញ្ចឹមកូនដែលនៅតូចដើម្បីឱ្យគាត់បានចូលរៀនដូចកុមារដទៃ ព្រមទាំងសូមបួងសួងឱ្យដួងវិញ្ញាណក្ខន្ធ លោកស្រី ហ៊ុ ផល្លិះ បានទៅកាន់សុគតិភព កុំបីឃ្លៀងឃ្លាតឡើយ។

សូមបញ្ជាក់ថាអំណោយមនុស្សធម៌របស់សាខាកាកបាទក្រហមកម្ពុជាខេត្តកំពង់ធំ បានប្រគល់ជូនគ្រួសារសពរួមមាន៖ អង្ករ៥០គីឡូក្រាម មី១កេស ត្រីខ០១កេស ទឹកត្រី០១យួរ  ទឹកស៊ីអ៊ីវ០១យួរ និងថវិកា១លានរៀល៕

ដោយ ស៊ុម វណ្ណា