AKP ភ្នំពេញ ថ្ងៃទី១១ ខែមេសា ឆ្នាំ២០២៥ -- នៅសាលប្រជុំទីស្តីការក្រសួងធនធានទឹក និងឧតុនិយម ក្បាលថ្នល់ កាលពីថ្ងៃទី១០ ខែមេសា ឆ្នាំ២០២៥ ឯកឧត្តម ហ៊ែល តូនី អនុប្រធានក្តាប់រួមអាជ្ញាធរទន្លេសាប បានអញ្ជើញជាអធិបតីដឹកនាំកិច្ចប្រជុំពង្រឹងប្រសិទ្ធភាពការងាររបស់អគ្គលេខាធិការដ្ឋាន អាជ្ញាធរទន្លេសាប ដោយមានការអញ្ជើញចូលរួមពីឯកឧត្តមអនុប្រធាន ឯកឧត្តមអគ្គលេខាធិការ ឯកឧត្តមអគ្គលេខាធិការរង ប្រធាន អនុប្រធាននាយកដ្ឋាន ប្រធាន អនុប្រធានការិយាល័យ និងមន្រ្តីរាជការក្រោមឱវាទអគ្គលេខាធិការដ្ឋាន អាជ្ញាធរទន្លេសាប ។

កិច្ចប្រជុំស្តីពីការពង្រឹងប្រសិទ្ធភាពការងាររបស់អគ្គលេខាធិការដ្ឋានអាជ្ញាធរទន្លេសាបធ្វើឡើងដើម្បីពិនិត្យ ពិភាក្សាសមិទ្ធផលអនុវត្តការងាររយៈពេល៣ខែ ក្នុងត្រីមាសទី១ ឆ្នាំ២០២៥ និងស្វែងរកចំណុចខ្លាំង ចំណុចខ្សោយព្រមទាំងបញ្ហាប្រឈម នៃការអនុវត្តតួនាទីភារកិច្ច ផែនការសកម្មភាពប្រចាំ ឆ្នាំ២០២៥។ ពិនិត្យ និងពិភាក្សាលើការគ្រប់គ្រងស្ថាប័ននិងបង្កើនប្រសិទ្ធភាពអនុវត្តន៍ការងាររបស់អគ្គលេខាធិការដ្ឋាន អាជ្ញាធរទន្លេសាបស្របតាមបរិបទនៃកំណែទម្រង់រដ្ឋបាលរបស់រាជរដ្ឋាភិបាល អាណត្តិទី៧។ ពិនិត្យ និងផ្តល់មតិណែនាំក្នុងការតម្រង់ទិសដល់អង្គភាព និងមន្រ្តីក្រោមឱវាទអគ្គលេខាធិការដ្ឋាន អាជ្ញាធរទន្លេសាប ដើម្បីអនុវត្តបានត្រឹមត្រូវតាមតួនាទីភារកិច្ចស្នូល ប្រសិទ្ធភាពការងារ សាមគ្គីភាព និងសុខដុមនីយកម្មការងារក្នុងអគ្គលេខាធិការដ្ឋានអាជ្ញាធរទន្លេសាប។

ក្នុងឱកាសនេះ ឯកឧត្ដម ប្រធានអង្គប្រជុំ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់មន្ត្រីគ្រប់ថ្នាក់ របស់នាយកដ្ឋានក្នុងការសម្រេចបាននូវលទ្ធផលល្អប្រសើរ លើការអនុវត្តតួនាទីភារកិច្ចស្នូល អនុវត្តផែនការសកម្មភាព អនុវត្តការងារចំពោះមុខ ដែលថ្នាក់ដឹកនាំប្រគល់ជូនការគ្រប់គ្រង ចាត់ចែង ព្រមទាំងសាមគ្គីភាពផ្ទៃក្នុងរបស់នាយកដ្ឋានផងដែរ៕

ដោយ ណយ នឿន (ប្រភព៖ អាជ្ញាធរទន្លេសាប)