AKP ភ្នំពេញ ថ្ងៃទី១១ ខែមេសា ឆ្នាំ២០២៥ -- អាជ្ញាធរសុខាភិបាលក្នុងតំបន់បានរាយការណ៍កាលពីថ្ងៃព្រហស្បតិ៍ថា យ៉ាងហោចណាស់ជនជាតិប៉ាឡេស្ទីន ៤០នាក់បានស្លាប់ និង១៤៦នាក់ផ្សេងទៀតបានរងរបួសនៅក្នុងការវាយប្រហារតាមអាកាសរបស់អ៊ីស្រាអែលនៅទូទាំងតំបន់ហ្គាហ្សាស្ទ្រីបក្នុងរយៈពេល ២៤ម៉ោងចុងក្រោយនេះ។

នៅក្នុងសេចក្តីថ្លែងការណ៍មួយបានឱ្យដឹងថា អាជ្ញាធរសុខាភិបាលដែលមានមូលដ្ឋាននៅតំបន់ហ្គាហ្សា បាននិយាយថា សាកសពជនរងគ្រោះនិងអ្នករបួសត្រូវបានបញ្ជូនទៅមន្ទីរពេទ្យ។

យោងតាមសេចក្តីថ្លែងការណ៍នោះ ចំនួនជនជាតិប៉ាឡេស្ទីនដែលត្រូវបានសម្លាប់ចាប់តាំងពីអ៊ីស្រាអែលចាប់ផ្តើមការវាយប្រហារនៅតំបន់ហ្គាហ្សាឡើងវិញនៅថ្ងៃទី១៨ ខែមីនា បានកើនឡើងដល់ ១.៥២២នាក់ដែលនាំឱ្យចំនួនអ្នកស្លាប់សរុបចាប់តាំងពីសង្គ្រាមចាប់ផ្តើមក្នុងខែតុលាឆ្នាំ២០២៣ កើនដល់ ៥០.៨៨៦នាក់ដោយបន្ថែមពីលើអ្នករងរបួសចំនួន១១៥.៨៧៥នាក់។

អាជ្ញាធរសុខាភិបាលក៏បានអំពាវនាវឱ្យមានការបង្កើនការផ្គត់ផ្គង់ផ្នែកវេជ្ជសាស្រ្ដ ដើម្បីដោះស្រាយកង្វះខាតយ៉ាងធ្ងន់ធ្ងរនៃឱសថ និងឧបករណ៍វេជ្ជសាស្ត្រសំខាន់ៗនៅក្នុងមន្ទីរពេទ្យ និងមណ្ឌលថែទាំបឋមរបស់តំបន់ហ្គាហ្សា។

អាជ្ញាធរ​បាន​ព្រមាន​ថា ការ​បិទ​ច្រកព្រំដែន​ឆ្លង​ចូល​តំបន់​ហ្គាហ្សា​កំពុង​ធ្វើ​ឱ្យកើតមាន​វិបត្តិ​​កាន់​តែ​ធ្ងន់ធ្ងរ។ យោងតាមការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ បានឱ្យដឹងថា រាល់ការឆ្លងកាត់ចូលទៅក្នុងតំបន់ហ្គាហ្សានៅតែបិទសម្រាប់ការដឹកជញ្ជូនជំនួយមនុស្សធម៌ និងវិស័យពាណិជ្ជកម្មចាប់តាំងពីថ្ងៃទី២ ខែមីនា។

កាលពីថ្ងៃព្រហស្បតិ៍ផងដែរ ប្រភពប៉ាឡេស្ទីនបាននិយាយថាអាជ្ញាធរអ៊ីស្រាអែលបានដោះលែងអ្នកទោសប៉ាឡេស្ទីន ១០នាក់តាមរយៈច្រករបៀង Kissufim ដែលជាច្រកតូចមួយទៅកាន់ភាគឦសាននៃទីក្រុងខាន់យូនីស នៅភាគខាងត្បូងតំបន់ហ្គាហ្សា។ យោធាអ៊ីស្រាអែលបានឃុំខ្លួនជនជាតិប៉ាឡេស្ទីនរាប់ពាន់នាក់ក្នុងអំឡុងពេលនៃការវាយប្រហារតាមផ្លូវគោករបស់ខ្លួននៅក្នុងតំបន់ហ្គាហ្សាចាប់តាំងពីខែតុលា ឆ្នាំ២០២៣៕

ដោយ៖ មូល មិនា (ប្រភព៖ ភីបផលដេលី)