AKP ភ្នំពេញ ថ្ងៃទី១១ ខែមេសា ឆ្នាំ២០២៥ -- រដ្ឋមន្ត្រីការបរទេសអ៊ីរ៉ង់លោក សេយេដ អាប់បាស់ អារ៉ាហ្គជី (Seyed Abbas Araghchi) បានទៅដល់ប្រទេសអាល់ហ្សេរីសម្រាប់ដំណើរទស្សនកិច្ចជាផ្លូវការដោយជួបពិភាក្សាជាមួយមន្ត្រីជាន់ខ្ពស់អាល់ហ្សេរី ដើម្បីពិភាក្សាអំពីទំនាក់ទំនងទ្វេភាគី និងការអភិវឌ្ឍក្នុងតំបន់ រួមទាំងជម្លោះដែលកំពុងបន្តនៅក្នុងតំបន់ហ្គាហ្សាស្ទ្រីប។

លោកប្រធានាធិបតីអាល់ហ្សេរីបាននិយាយនៅក្នុងសេចក្តីថ្លែងការណ៍មួយថា លោក អារ៉ាហ្គជី និងគណៈប្រតិភូរបស់លោកត្រូវបានទទួលដោយប្រធានាធិបតីអាល់ហ្សេរី លោក អាប់ដេលម៉ាដជីដ តេបប៊ូន (Abdelmadjid Tebboune) នៅវិមានប្រធានាធិបតីក្នុងទីក្រុង Algiers ។

បន្ទាប់ពីកិច្ចប្រជុំនេះ លោក អារ៉ាហ្គជី បានអះអាងសារជាថ្មីអំពីទំនាក់ទំនង «ដ៏រឹងមាំ និងយូរអង្វែង» រវាងទីក្រុងតេអេរ៉ង់ និងទីក្រុង Algiers ដោយហៅទំនាក់ទំនងនេះថា «ជាបងប្អូន និងចាក់ឫសយ៉ាងជ្រៅ»។

ថ្លែងទៅកាន់អ្នកសារព័ត៌មាន លោក អារ៉ាហ្គជី បាននិយាយថា លោកបានពាំនាំការសួរសុខទុក្ខពីប្រធានាធិបតីអ៊ីរ៉ង់ លោក ម៉ាសូដ ប៉េហ្សេគីអាន (Masoud Pezeshkian) និងបានបន្តការអញ្ជើញជាផ្លូវការសម្រាប់លោក តេបប៊ូន ឱ្យទៅបំពេញទស្សនកិច្ចនៅទីក្រុងតេអេរ៉ង់។

លោកបាននិយាយថា កិច្ចពិភាក្សាបានគ្របដណ្តប់លើប្រធានបទជាច្រើន រួមទាំងបញ្ហាទ្វេភាគី តំបន់ និងអន្តរជាតិ ដោយភាគីទាំងពីរបានសង្កត់ធ្ងន់លើ «ទស្សនៈរួមបញ្ចូលគ្នា» និងការសម្របសម្រួលនៅក្នុងវេទិកាពហុភាគី។

រដ្ឋមន្ត្រី​អ៊ីរ៉ង់​បាន​និយាយ​ថា ការ​ពិភាក្សា​ក៏​ផ្តោត​លើ​ស្ថានភាព​នៅតំបន់​ហ្គាហ្សាផង​ដែរ។ លោកបានសរសើរគោលជំហរ «ដ៏ក្លាហាន និងជាគោលការណ៍» របស់ប្រទេសអាល់ហ្សេរី ចំពោះប៉ាឡេស្ទីន ដែលបានបង្ហាញជាញឹកញាប់នៅអង្គការសហប្រជាជាតិ និងក្នុងសម័យប្រជុំក្រុមប្រឹក្សាសន្តិសុខដែលជាការគាំទ្រយ៉ាងម៉ឺងម៉ាត់ចំពោះសិទ្ធិប៉ាឡេស្ទីន៕

ដោយ៖ មូល មិនា (ប្រភព៖ ស៊ីនហួ)