AKP ភ្នំពេញ ថ្ងៃទី១១ ខែមេសា ឆ្នាំ២០២៥ -- ការរញ្ជួយដីកម្រិត ៥,៩រ៉ិចទ័របានកើតឡើងនៅឆ្នេរសមុទ្រភាគខាងត្បូងនៃខេត្តប៉ាពួខាងលិចរបស់ប្រទេសឥណ្ឌូណេស៊ី កាលពីថ្ងៃទី១០ ខែមេសា ម្សិលមិញនេះ។

ទីភ្នាក់ងារឧតុនិយម អាកាសធាតុ និងភូគព្ភសាស្ត្រឥណ្ឌូណេស៊ី បានរាយការណ៍ថា ការរញ្ជួយដីនេះមានជម្រៅ ៦០គីឡូម៉ែត្រ ដោយចំណុចកណ្តាលស្ថិតនៅចម្ងាយ ១០៥គីឡូម៉ែត្រភាគអាគ្នេយ៍នៃស្រុកអាស្មាត។

ការរាយការណ៍នោះ​បាន​បញ្ជាក់​ថា ​គ្មាន​ការ​ព្រមាន​អំពី​រលក​យក្ស​ស៊ូណាមិ​ណាមួយត្រូវ​បាន​ចេញ​ផ្សាយនោះ​ទេ។

ប្រទេសឥណ្ឌូណេស៊ីដែលជាប្រទេសប្រជុំកោះ ងាយនឹងកើតមានការរញ្ជួយដីដោយសារទីតាំងរបស់វានៅលើរង្វង់ភ្លើងប៉ាស៊ីហ្វិកដែលមានសកម្មភាពរញ្ជួយច្រើន។ ប្រទេសនេះក៏មានភ្នំភ្លើងសកម្មចំនួន១២៧ ដែលមានសកម្មភាពផ្ទុះឡើងជាញឹកញាប់ផងដែរ៕

ដោយ៖ យា ចិន្ដាខន្ដី (ប្រភព៖ VNA)