AKP កំពង់ធំ ថ្ងៃទី១១ ខែមេសា ឆ្នាំ២០២៥-- លោក អ៊ុង វុទ្ធី អភិបាលរងខេត្តកំពង់ធំ បានជួបសំណេះសំណាល និងសួរសុខទុក្ខដល់កងកម្លាំងទាំងបី ទីបញ្ជាការស្រាលទប់ស្កាត់និងបង្ក្រាបបទល្មើសធនធានធម្មជាតិមកពីតាមបណ្តាក្រុង/ស្រុកទាំង៦ជាប់បឹងទន្លេសាប កាលពីរសៀលថ្ងៃទី១០ ខែមេសា ឆ្នាំ២០២៥ នៅសាលប្រជុំសាលាខេត្តកំពង់ធំ។

លោក អ៊ុង វុទ្ធី បានមានប្រសាសន៍លើកឡើងថា ពិធីបុណ្យចូលឆ្នាំប្រពៃណីជាតិខ្មែរខិតជិតចូលមកដល់នាពេលខាងមុខនេះ រដ្ឋបាលខេត្តកំពង់ធំ និងមន្ទីរអង្គភាពជុំវិញខេត្តបានប្រគល់ជូនគ្រឿងឧបភោគបរិភោគ និងថវិកាមួយចំនួនដើម្បីលើកទឹកចិត្តដល់កងកម្លាំងទាំងបីទៅទីបញ្ជាការស្រាលទាំង៦ក្រុង/ស្រុកដែលបានចុះល្បាតនិងយាមនៅថ្ងៃបុណ្យចូលឆ្នាំថ្មីប្រពៃណីជាតិរយៈពេល៣ថ្ងៃ ចាប់ពីថ្ងៃទី១៤-១៦ខែមេសា ឆ្នាំ២០២៥។

លោកអភិបាលរងខេត្តបានលើកទឹកចិត្តនិងជំរុញដល់មន្ទីរអង្គភាព រដ្ឋបាលក្រុង/ស្រុក មានភារកិច្ចទទួលខុសត្រូវក្នុងការគាំទ្រទាំងផ្នែកសម្ភារៈថវិកានិងមធ្យោបាយ ជួយដល់ទីបញ្ជាការស្រាលដែលជាដៃគូសម្ព័ន្ធមេត្រីភាពរបស់ខ្លួនឱ្យអស់ពីលទ្ធភាពក្នុងការអនុវត្តភារកិច្ចទប់ស្កាត់ និងបង្ក្រាបបទល្មើសធនធានធម្មជាតិឱ្យមានប្រសិទ្ធភាពខ្ពស់។ សូមឯកឧត្តមប្រធានសាលាដំបូងខេត្ត មេបញ្ជាការតំបន់ប្រតិបត្តិការសិករងកំពង់ធំ ស្នងការនគរបាលខេត្ត មេបញ្ជាការកងរាជអាវុធហត្ថខេត្ត រដ្ឋបាលសាលាខេត្ត ប្រធានមន្ទីរអង្គភាពក្នុងខេត្ត អភិបាលក្រុង/ស្រុកទាំង៩ប្រធានទីបញ្ជាការស្រាលទាំង១៥ត្រូវទទួលបន្ទុកតាមភារកិច្ចរៀងៗខ្លួន។ 

សូមជម្រាបជូនថា គ្រឿងឧបភោគបរិភោគដែលប្រគល់ជូនដល់ទីបញ្ជាការស្រាលទាំង៦ក្រុង/ស្រុក រួមមាន៖ អង្ករ មី ទឹកត្រី ទឹកស៊ីអ៊ីវ ទឹកផ្លែឈើ ទឹកសុទ្ធ ត្រីខនិងថវិកាមួយចំនួនទៀតផងដែរ៕

ដោយ ស៊ុម វណ្ណា