AKP កំពង់ធំ ថ្ងៃទី១១ ខែមេសា ឆ្នាំ២០២៥-- មន្ទីរកិច្ចការនារីខេត្តសហការជាមួយគម្រោងQSAបានរៀបចំបើកវគ្គបណ្តុះបណ្តាលស្តីពីការទប់ស្កាត់អំពើហិង្សា និងការគ្រប់គ្រងអារម្មណ៍ដល់អ្នកទទួលបន្ទុកកិច្ចការនារី និងកុមារឃុំ-សង្កាត់ទាំង៨១ក្នុងខេត្តកំពង់ធំ នៅសាលប្រជុំមន្ទីរកិច្ចការនារីខេត្តកំពង់ធំកាលពីថ្ងៃទី០៩-១០ ខែមេសា ឆ្នាំ២០២៥ ក្រោមអធិបតីភាព លោកស្រី ស៊ិន ស៊ីផាន ប្រធានមន្ទីរកិច្ចការនារីដែលមានអ្នកចូលរួមសរុប៨១នាក់(ស្រី៨០នាក់)។

លោកស្រី ស៊ិន ស៊ីផាន បានមានប្រសាសន៍ថា វគ្គបណ្តុះបណ្តាលនេះមានគោលបំណងឱ្យអ្នកចូលរួមទាំងអស់យល់ដឹងពីនិយមន័យនៃអំពើហិង្សា ប្រភេទនៃអំពើហិង្សាមូលហេតុនិងផលប៉ះពាល់នៃអំពើហិង្សា យន្តការដោះស្រាយអំពើហិង្សានិងវិធីសាស្រ្តក្នុងការគ្រប់គ្រងអារម្មណ៍លំបាកៗដើម្បីឱ្យអ្នកចូលរួមយកចំណេះដឹងទាំងនេះទៅផ្សព្វផ្សាយបន្តនៅតាមសហគមន៍រៀងៗខ្លួន។

ទន្ទឹមនឹងនេះ លោកស្រីបានលើកទឹកចិត្តដល់អ្នកចូលរួមឱ្យផ្តោតទៅលើការយកចិត្តទុកដាក់ជួយជនរងគ្រោះដែលជាស្រ្តី និងកុមារក្នុងនាមយើងជាអ្នកទទួលបន្ទុកការងារស្រ្តីនិងកុមារនៅតាមសហគមន៍។សំខាន់ជាងនេះទៅទៀតសូមឱ្យអ្នកចូលរួមផ្សព្វផ្សាយនូវវិធីសាស្ត្រនៃការគ្រប់គ្រងអារម្មណ៍ដើម្បីយើងបានទប់ស្កាត់មុន មិនឱ្យមានការកើតឡើងនៅអំពើហិង្សានិងចេះគ្រប់គ្រងអារម្មណ៍បានល្អដើម្បីថែរក្សានៅសហគមន៍ភូមិឃុំមានសុវត្ថិភាពល្អ៕

ដោយ ស៊ុម វណ្ណា