AKP ភ្នំពេញ ថ្ងៃទី១០ ខែមេសា ឆ្នាំ២០២៥-- លោកជំទាវ មឹន មាណវី អគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោកបានថ្លែងថា នៅក្នុងឱកាសបុណ្យប្រពៃណីជាតិធំៗដូចជាបុណ្យចូលឆ្នាំខ្មែរ បុណ្យភ្ជុំបិណ្ឌជាដើម ស្ថានភាពនៃគ្រោះថ្នាក់ចរាចរណ៍តែងតែកើតមានក្នុងអត្រាខ្ពស់ ដែលទាមទារឱ្យអ្នកបើកបរយានយន្ដគ្រប់ប្រភេទចូលរួមគោរពច្បាប់ចរាចរណ៍ទាំងអស់គ្នាដើម្បីឈានទៅកាត់បន្ថយអត្រាគ្រោះថ្នាក់ចរាចរណ៍ឱ្យនៅកម្រិតទាប និងទប់ស្កាត់ការបាត់បង់អាយុជីវិតរបស់ប្រជាពរដ្ឋ។ ការលើកឡើងរបស់លោកជំទាវ មឹន មាណវី ដូចនេះ ធ្វើឡើងក្នុងឱកាសនៃការចុះផ្សព្វផ្សាយអប់រំពីច្បាប់ចរាចរណ៍ផ្លូវគោក និងចែកមួកសុវត្ថិភាពដល់ក្រុមអ្នកជិះម៉ូតូ នៅលើផ្លូវជាតិលេខ៤ ជាប់ព្រំប្រទល់ភូមិសាស្ត្ររវាងខេត្តកណ្តាល និងខេត្តកំពង់ស្ពឺ នាថ្ងៃទី១០ ខែមេសា ឆ្នាំ២០២៥ ក្រោមការចូលរួមពីតំណាងរាជរដ្ឋាភិបាល សង្គមស៊ីវិល ដៃគូអភិវឌ្ឍន៍ និងវិស័យឯកជន។

 
ក្នុងឱកាសនោះ លោកជំទាវអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោកបានអំពាវនាវដល់អ្នកប្រើប្រាស់ផ្លូវទាំងអស់ឱ្យចូលរួមគោរពច្បាប់ចរាចរណ៍ទាំងអស់គ្នា ដោយមុននឹងចេញដំណើរត្រូវត្រួតពិនិត្យលក្ខណៈបច្ចេកទេសយានយន្តជានិច្ច ពិសេសត្រួតពិនិត្យកង់ ដៃចង្កូត ហ្វ្រាំង និងភ្លើងបំភ្លឺជាដើម ហើយជាងនេះទៀត មិនត្រូវបើកបរលើសល្បឿនកំណត់ និងមិនត្រូវបើកបរក្រោមឥទ្ធិពលនៃគ្រឿងស្រវឹងជាដាច់ខាត។

គណៈកម្មាធិការជាតិសុវត្ថិភាពចរាចរណ៍ផ្លូវគោកបានកត់សម្គាល់ថា ក្នុងអំឡុងនៃពិធីបុណ្យប្រពៃណីជាតិធំៗ តែងតែកើតមានករណីគ្រោះថ្នាក់ចរាចរណ៍ច្រើនលើសថ្ងៃធម្មតា ដោយសារការបើកបរក្រោមឥទ្ធិពលស្រវឹង ការបើកបរហួសល្បឿនកំណត់ ការបើកបរមិនគោរពសិទ្ធិអាទិភាពនៅលើដងផ្លូវ និងការវ៉ាជែងក្នុងស្ថានភាពគ្រោះថ្នាក់ ប្រើប្រាស់ទូរស័ព្ទដៃក្នុងពេលបើកបរ បើកបរខុសទិសចរាចរណ៍ ឬស្លាកសញ្ញា មិនគោរពភ្លើងសញ្ញាចរាចរណ៍ និងសិទ្ធិអាទិភាពជាដើម៕

ដោយ៖ ចាន់ សុភឿន