AKP កំពង់ចាម ថ្ងៃទី១០ ខែមេសា ឆ្នាំ២០២៥ -- រដ្ឋបាលខេត្តកំពង់ចាមបានរៀចំពិធីសូត្រមន្តចម្រើនព្រះបរិត្ត និងជួបសំណេះសំណាលជាមួយមន្ត្រីរាជ ក្នុងឱកាសអបអរឆ្នាំថ្មីប្រពៃណីជាតិ ឆ្នាំម្សាញ់ សប្តស័ក ព.ស.២៥៦៩ ដែលនឹងឈានចូលមកដល់នាពេលខាងមុខ ក្រោមអធិបតីភាព ឯកឧត្តម ខ្លូត ផន ប្រធានក្រុមប្រឹក្សាខេត្ត និងឯកឧត្តម អ៊ុន ចាន់ដា  អភិបាលខេត្តកំពង់ចាម ដោយមានការអញ្ជើញចូលរួមពីឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត លោក លោកស្រីនាយក នាយករងទីចាត់ការ និងអង្គភាពចំណុះសាលាខេត្ត មន្ត្រីរាជការ មន្ត្រីជាប់កិច្ចសន្យានៃរដ្ឋបាលខេត្តកំពង់ចាម។

ពិធីសូត្រមន្តចម្រើនព្រះបរិត្តបានប្រារព្ធទៅតាមគន្លងប្រពៃណីព្រះពុទ្ធសាសនាដ៏ផូរផង់ ដោយមានការបូជាទៀនធូប ផ្កាភ្ញី គ្រឿងសក្ការៈនានា ថ្វាយព្រះរតនត្រៃ និងបាននិមន្តព្រះសង្ឃដើម្បីចម្រើនព្រះបរិត្ត ស្វាធ្យាយជយន្តោ ពុទ្ធជ័យមង្គល ជាកិច្ចទទួលអំណរសាទរឆ្នាំថ្មី ប្រពៃណីជាតិខ្មែរ ជាពិសេស បានបួងសួងដល់ទេវតាឆ្នាំថ្មី ដែលនឹងមកគ្រប់គ្រងភពផែនដីបន្ដពីទេវតាឆ្នាំចាស់ សូមប្រោះព្រំសព្វសាធុការពរជ័យ សិរីមង្គលបវរមហាប្រសើរ ជូនដល់ថ្នាក់ដឹកនាំ មន្ត្រីរាជការទាំងអស់  ក៏ដូចជាប្រជាពលរដ្ឋ ខ្មែរគ្រប់ៗរូប ឱ្យទទួលបានសុខភាពល្អ សេចក្ដីសុខចម្រើនរុងរឿង មានសុភមង្គលគ្រប់ក្រុមគ្រួសារ ព្រមទាំងទទួលបានជោគជ័យរាល់ការបំពេញភារកិច្ចនានាក្នុងឆ្នាំថ្មី និងជានិច្ចនិរន្តរ៍រៀងទៅ។

ក្នុងពិធីនេះ ឯកឧត្តម អ៊ុន ចាន់ដា បានបញ្ជាក់ថា ជារៀងរាល់ឆ្នាំការជួបជុំគ្នា គឺជាប្រពៃណី ទំនៀមទម្លាប់ដែលថ្នាក់ដឹកនាំខេត្តតែងតែប្រារព្ធធ្វើឡើងជារៀងរាល់ឆ្នាំ គឺក្នុងឱកាសបុណ្យចូលឆ្នាំខ្មែរ និងពិធីបុណ្យភ្ជុំបិណ្ឌ ដើម្បីជួបសំណេះសំណាល ជាមួយបងប្អូនមន្ត្រីរាជការ គ្រប់លំដាប់ថ្នាក់របស់រដ្ឋបាលខេត្ត ទាំងមន្ត្រី និវត្តជន មន្ត្រីកិច្ចសន្យា កម្មករ ដែលបាន ខិតខំបំពេញការងារតាមតួនាទីរបស់ខ្លួន ក្នុងរយៈពេល១ឆ្នាំចាស់កន្លងទៅ មន្ត្រីរាជការនៅក្នុងរដ្ឋបាលខេត្តកំពង់ចាម ដែលបានខិតខំបំពេញការងារយ៉ាងសកម្ម ធ្វើឲ្យសម្រេចបាននូវសមិទ្ធផលជាច្រើន គួរជាទីមោទនៈ ពិសេសការអនុវត្តនូវការងារសន្តិសុខសណ្ដាប់ធ្នាប់បានល្អ តាមរយៈការអនុវត្ត គោលនយោបាយភូមិ ឃុំ សង្កាត់ មានសុវត្ថិភាព រហូតដែលយើងទទួលបានជ័យលាភី លេខ១ ទាំង១០៩ ឃុំ សង្កាត់ និងមន្ទីរពេទ្យខេត្តកំពង់ចាមរបស់យើង ក៏ទទួលបានពានរង្វាន់ជ័យលាភីលេខ១ទូទាំងប្រទេស នៅឆ្នាំ២០២៥ រដ្ឋបាលខេត្ត និងសម្រេចបាននូវលទ្ធផលការងារល្អៗបន្ថែមទៀត។

ឯកឧត្តម អភិបាលខេត្ត បានបញ្ជាក់ថា អ្វីៗដែលយើងមានឱកាសបានមកជួបជុំគ្នាគឺបានមកដោយសារប្រទេស មានសុខសន្តិភាពពេញលេញ ក្រោមការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត ជាប្រមុខដឹកនាំប្រទេសបន្តពីសម្តេចអគ្គមហាសេនាបតីតេជោហ៊ុនសែន ជាប្រធានព្រឹទ្ធសភាបានធ្វើឲ្យប្រទេសជាតិនិងប្រជាពលរដ្ឋរស់នៅនៅប្រកបដោយសុខដុមរមនាក្រោមដំបូលសុខ។បើគ្មានសន្តិភាពបើគ្មានសុខសន្តិភាពទេយើងមិនអាច ធ្វើអ្វីបានទាំងអស់។ ដូចនេះកត្តាសុខសន្តិភាពនេះសំខាន់ណាស់។ ចូរយើងទាំងអស់គ្នារួមគ្នា ថែរក្សាសុខសន្តិភាពឱ្យបានគង់វង្សតកូនចៅរបស់យើង។ អាជ្ញាធរគ្រប់លំដាប់ថ្នាក់ត្រូវរួមគ្នា ថែរក្សាសុខសន្តិភាពនេះ។ សមិទ្ធផលដែលខេត្តកំពង់ចាមទទួលបាន យើងអាចនិយាយបានថា ជាសមិទ្ធផលដែលកើតចេញពីការខិតខំប្រឹងប្រែងរបស់យើងទាំងអស់គ្នា ពោលគឺ ពីមន្ត្រីរាជការពាក់ព័ន្ធ ពីរដ្ឋបាលខេត្តកំពង់ចាមរបស់យើងទាំងមូល ដូចនេះយើង ត្រូវយកចិត្តទុកដាក់ក្នុងពង្រឹងសមត្ថភាព និងការទទួលខុសត្រូវក្នុងការងាររៀងៗខ្លួនឱ្យបានល្អប្រសើរ ពិសេសត្រូវពង្រឹងសមត្ថភាព ទៅតាមតួនាទីភារកិច្ចជាក់ស្តែង ធ្វើយ៉ាងណាត្រូវបំពេញតួនាទីភារកិច្ចរបស់ខ្លួនបានកាន់តែច្បាស់លាស់ មានប្រសិទ្ធភាព និងប្រសិទ្ធផលខ្ពស់ ក្លាយជាមន្ត្រីដែលមានសក្ដានុពល ក្នុងភាពម្ចាស់ការបំពេញភារកិច្ចរបស់ខ្លួនបានកាន់ល្អប្រសើរឆ្លើយតបបានតែនៅតម្រូវការជាក់ស្ដែងរបស់រដ្ឋបាលខេត្ត ក៏ដូចជាប្រជាពលរដ្ឋផងដែរ នាឆ្នាំ២០២៥ នេះទទួបាន ជោគជ័យជូនដល់ខេត្ត។

សូមបញ្ជាក់ថា ពិធីសូត្រមន្តចម្រើនព្រះបរិត្តរៀបចំឡើងដើម្បីប្រសិទ្ធិពរជ័យ សិរីមង្គល អបអរសាទរឆ្នាំថ្មីប្រពៃណីជាតិខ្មែរ ជាពិសេស បានបូងសួងដល់ទេវតាឆ្នាំថ្មី ដែលនឹងមកគ្រប់គ្រងភពផែនដីបន្តពីទេវតាឆ្នាំចាស់ សូមប្រោះព្រំសព្វសាធុការពរជ័យ សិរីមង្គលបវរមហាប្រសើរ ជូនដល់ថ្នាក់ដឹកនាំ មន្ត្រីរាជការនិងបុគ្គលិកទាំអស់របស់រដ្ឋបាលខេត្តក៍ដូចជាប្រជាពលរដ្ឋខ្មែរគ្រប់ៗរូបឱ្យទទួលបាន សុខភាពល្អ សេចក្តីសុខចម្រើនរុងរឿង មានសុភមង្គលគ្រុមគ្រួសារ ព្រមទាំងទទួលបានជោគជ័យរាល់ការបំពេញភារកិច្ចនានាក្នុងឆ្នាំថ្មី និងជានិច្ចនិរន្តរ៍តរៀងទៅ៕

ដោយ ឆាយ ម៉ុត