AKP ភ្នំពេញ ថ្ងៃទី១០ ខែមេសា ឆ្នាំ២០២៥-- ប្រតិភូក្រសួងអប់រំ យុវជន និងកីឡា ដឹកនាំដោយឯកឧត្តមបណ្ឌិត អ៊ឹម កុច រដ្ឋលេខាធិការក្រសួងអប់រំ យុវជន និងកីឡា ចាប់ពីថ្ងៃទី០៦ ដល់ថ្ងៃទី១១ ខែមេសា ឆ្នាំ២០២៥ បានធ្វើដំណើរទស្សនកិច្ចសិក្សានៅប្រទេសបារាំង ដើម្បី «សិក្សាស្វែងយល់ពីបរិវត្តកម្មការអប់រំបច្ចេកទេស»។

ដំណើរទស្សនកិច្ចនេះមានគោលបំណងសិក្សាស្វែងយល់ និងទស្សនាផ្ទាល់ពីការអនុវត្តប្រព័ន្ធអប់រំបច្ចេកទេសនៅប្រទេសបារាំង ដោយផ្តោតសំខាន់លើពីរចំណុចសគខាន់ៗដែល ទី១. កម្មវិធីការសិក្សាផ្សារភ្ជាប់នឹងការងារ (Dual System, Work Based Learning) ទី២. ការរៀបចំកម្មវិធីសិក្សាដែលឆ្លើយតបនឹងតម្រូវការទីផ្សារការងារ និងការកែសម្រួលកម្មវិធីសិក្សាដោយដាក់បញ្ចូលនូវកម្មវិធី Green Development, Digitalization, adaptive Climate change និង៣. ការរៀនសូត្រពីកម្មវិធីការបណ្តុះបណ្តាលសមត្ថភាពគ្រូបង្រៀនផ្នែកអប់រំបច្ចេកទេស។

ដំណើរទស្សនកិច្ចនេះមានការចូលរួមពីសមាជិកក្រុមការងារបច្ចេកទេសក្នុងសមាសភាគនៃគម្រោងសម្ព័ន្ធមេត្រីភាពកម្ពុជា-សហភាពអឺរ៉ុប លើកំណែទម្រង់ការអប់រំបច្ចេកទេស កម្រិតមធ្យមសិក្សាទុតិយភូមិនៅកម្ពុជា រួមមានឯកឧត្តមបណ្ឌិត អ៊ឹម កុច អនុរដ្ឋលេខាធិការ តំណាងវិទ្យាស្ថានបច្ចេកវិទ្យាកំពង់ឈើទាល វិទ្យាស្ថានបច្ចេកវិទ្យាកំពង់ស្ពឺ វិទ្យាស្ថានបច្ចេកវិទ្យាកម្ពុជា ថ្នាក់ដឹកនាំនិងមន្ត្រី នាយកដ្ឋានតម្រង់ទិសវិជ្ជាជីវៈ និងមានការចូលរួមពីអ្នកជំនាញការជនជាតិបារាំងដែលប្រចាំការនៅប្រទេសកម្ពុជា ក្នុងក្របខ័ណ្ឌគម្រោងចំនួន១នាក់ សរុបចំនួន១២នាក់៕

ដោយ ណយ នឿន (ប្រភព៖ នាយកដ្ឋានតម្រង់ទិសវិជ្ជាជីវៈ)