AKP ភ្នំពេញ ថ្ងៃទី១០ ខែមេសា ឆ្នាំ២០២៥-- ឯកឧត្តម នាយឧត្ដមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ កាលពីរសៀលថ្ងៃទី០៩ ខែមេសា ឆ្នាំ២០២៥ បានអនុញ្ញាតឱ្យឯកឧត្តម អុអីណូ អេសូស៊ី ឯកអគ្គរាជទូតជប៉ុន និងសេនានុព័ន្ធជប៉ុនប្រចាំកម្ពុជា ចូលជួបសម្ដែងការគួរសម និងថ្លែងអំណរគុណ ។

ឯកឧត្តម អុអីណូ អេសូស៊ី បានថ្លែងអំណរគុណរាជរដ្ឋាភិបាលកម្ពុជា ក្រសួងការពារជាតិ និងអគ្គបញ្ជាការ នៃកងយោធពលខេមរភូមិន្ទ ដែលបានអនុញ្ញាតឱ្យនាវារបស់ប្រទេសជប៉ុនចូលចតនៅមូលដ្ឋានរាម បន្ទាប់ពីមូលដ្ឋាននេះត្រូវបានសម្ពោធដាក់ឱ្យប្រើប្រាស់ជំហានទី១ កាលពីថ្ងៃទី០៥ មេសា កន្លងមកនេះ។

តាមប្រសាសន៍ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលសម្តេចបានផ្សព្វផ្សាយ ភាគីជប៉ុនសូមគាំទ្រ និងសូមឱ្យបណ្ដាប្រទេសដទៃទៀត មកទស្សនកិច្ចនៅព្រះរាជាណាចក្រកម្ពុជា ដូចនាវាជប៉ុននេះផងដែរ។

ឯកឧត្តម នាយឧត្តមសេនីយ៍ វង្ស ពិសេន សង្ឃឹមថា ពីពេលនេះតទៅថ្ងៃមុខនឹងមាននាវាជាបន្តបន្ទាប់ចូលចតនៅមូលដ្ឋានរាម និងសូមឱ្យការចូលចត ក៏ដូចជាការវិលត្រឡប់ទៅវិញប្រកបដោយសុវត្ថិភាព៕

ដោយ សំ សាម៉ន