AKP ភ្នំពេញ ថ្ងៃទី០៨ ខែមេសា ឆ្នាំ២០២៥ -- ក្រសួងពាណិជ្ជកម្មរបស់ទីក្រុងសេអ៊ូលបាននិយាយកាលពីថ្ងៃចន្ទថា រដ្ឋមន្ត្រីពាណិជ្ជកម្មកូរ៉េខាងត្បូងលោក ឆុង អ៊ីនយ៉ូ (Cheong In-kyo) នឹងធ្វើទស្សនកិច្ចនៅទីក្រុងវ៉ាស៊ីនតោនក្នុងសប្តាហ៍នេះ ដើម្បីការចរចារពន្ធជាមួយមន្ត្រីរដ្ឋបាលរបស់សហរដ្ឋអាមេរិក។

យោងតាមក្រសួងពាណិជ្ជកម្ម ឧស្សាហកម្ម និងថាមពល បានឱ្យដឹងថា លោក ឆុង គ្រោងនឹងធ្វើទស្សនកិច្ចនៅទីក្រុងវ៉ាស៊ីនតោនរយៈពេលពីរថ្ងៃចាប់ពីថ្ងៃអង្គារ (ម៉ោងនៅសហរដ្ឋអាមេរិក) ដើម្បីជួបជាមួយតំណាងពាណិជ្ជកម្មសហរដ្ឋអាមេរិក (USTR) លោក ចាមីសុន ហ្គ្រៀ (Jamieson Greer) និងមន្ត្រីរដ្ឋាភិបាលដទៃទៀត។

ដំណើរ​ទស្សនកិច្ច​របស់​លោក ឆុង ដែល​គ្រោង​ធ្វើ​ឡើង​បន្ទាប់​ពី​ប្រធានាធិបតី​សហរដ្ឋ​អាមេរិក ​លោក ដូណាល់ ត្រាំ (Donald Trump) បាន​ប្រកាស​ដំឡើង​ពន្ធ ២៥% ​សម្រាប់ប្រទេស​កូរ៉េ​ខាង​ត្បូង​កាល​ពី​សប្តាហ៍​មុនដែល​នឹង​ចូល​ជា​ធរមាន​នៅ​ថ្ងៃ​ពុធ។

ពន្ធថ្មីលើប្រទេសកូរ៉េខាងត្បូងគឺជាផ្នែកមួយនៃផែនការដ៏ទូលំទូលាយរបស់រដ្ឋបាលលោក ត្រាំ ដែលមានបំណងដាក់កាតព្វកិច្ចទៅវិញទៅមកពីប្រទេសមួយទៅប្រទេសមួយដើម្បីកាត់បន្ថយឱនភាពពាណិជ្ជកម្មរបស់សហរដ្ឋអាមេរិក និងជំរុញឧស្សាហកម្មផលិតក្នុងស្រុករបស់ខ្លួន។

ក្នុងអំឡុងពេលនៃការធ្វើដំណើររបស់លោកទៅកាន់ទីក្រុងវ៉ាស៊ីនតោននាពេលខាងមុខ លោក ឆុង គ្រោងនឹងដោះស្រាយការព្រួយបារម្ភរបស់ទីក្រុងសេអ៊ូលចំពោះកាតព្វកិច្ចថ្មីរបស់សហរដ្ឋអាមេរិក និងស្វែងរកវិធីកាត់បន្ថយអត្រាពន្ធសម្រាប់ប្រទេសកូរ៉េខាងត្បូង។

លោក ឆុង បាននិយាយនៅក្នុងសេចក្តីប្រកាសព័ត៌មានមួយថា «យើងស្ថិតក្នុងស្ថានភាពធ្ងន់ធ្ងរដែលក្រុមហ៊ុនកូរ៉េនាំចេញទៅ ឬប្រតិបត្តិការនៅសហរដ្ឋអាមេរិក ត្រូវបានគេរំពឹងថានឹងជួបការលំបាកដោយសារពន្ធគយដែលបានប្រកាសកាលពីថ្ងៃទី២ ខែមេសា ក៏ដូចជាពន្ធលើដែកអាលុយមីញ៉ូម រថយន្ត និងគ្រឿងបន្លាស់រថយន្ត»។

លោកបានបន្ថែមថា «រដ្ឋាភិបាលនឹងខិតខំប្រឹងប្រែងអស់ពីកម្លាំងកាយចិត្តក្នុងការចរចាជាមួយសហរដ្ឋអាមេរិក ដើម្បីកាត់បន្ថយផលប៉ះពាល់នៃគោលនយោបាយពាណិជ្ជកម្មរបស់ទីក្រុងវ៉ាស៊ីនតោនលើអាជីវកម្ម និងឧស្សាហកម្មកូរ៉េ»៕

ដោយ៖ មូល មិនា (ប្រភព៖ យ៉ុនហាប់)