AKP ភ្នំពេញ ថ្ងៃទី០៤ ខែមេសា ឆ្នាំ២០២៥ -- រដ្ឋមន្ត្រីការបរទេសអ៊ុយក្រែន លោក អានដ្រី ស៊ីប៊ីហា (Andrii Sybiha) បាននិយាយកាលពីថ្ងៃព្រហស្បតិ៍ថា លោកបានពិភាក្សាអំពីកិច្ចខិតខំប្រឹងប្រែងសន្តិភាពដែលកំពុងបន្តជាមួយរដ្ឋមន្ត្រីការបរទេសសហរដ្ឋអាមេរិក លោក ម៉ាកូ រូប៊ីអូ (Marco Rubio) នៅទីក្រុងព្រុចសែល ប្រទេសបែលហ្សិក។

លោក ស៊ីប៊ីហា បានសរសេរនៅលើវេទិកាប្រព័ន្ធផ្សព្វផ្សាយសង្គមអ៊ិចបន្ទាប់ពីកិច្ចពិភាក្សាថា «អ៊ុយក្រែនប្តេជ្ញាយ៉ាងពេញលេញចំពោះសន្តិភាព និងបានចាត់វិធានការជាក់ស្តែងដោយគ្មានលក្ខខណ្ឌដើម្បីសម្រេចបានវា។ ខ្ញុំក៏បានជូនដំណឹងដល់សមភាគីរបស់ខ្ញុំអំពីការរំលោភនាពេលថ្មីៗនេះរបស់រុស្ស៊ីចំពោះបទឈប់បាញ់លើថាមពលផងដែរ»។

លោកក៏បានអះអាងសារជាថ្មីអំពីចំណាប់អារម្មណ៍របស់អ៊ុយក្រែនក្នុងការអភិវឌ្ឍការវិនិយោគដែលមានអត្ថប្រយោជន៍ទៅវិញទៅមក និងកិច្ចសហប្រតិបត្តិការធនធានរ៉ែជាមួយសហរដ្ឋអាមេរិក។

រដ្ឋមន្ត្រីការបរទេសបាននិយាយថា លោកក៏បានពិភាក្សាជាមួយលោក រូប៊ីអូ អំពីទំនាក់ទំនងរវាងអ៊ុយក្រែន និងសហរដ្ឋអាមេរិកនៅពេលបន្ទាប់។ លោក ស៊ីប៊ីហា បានមកដល់ទីក្រុងព្រុចសែល កាលពីព្រឹកថ្ងៃព្រហស្បតិ៍ ដើម្បីចូលរួមកិច្ចប្រជុំរដ្ឋមន្ត្រីការបរទេសរបស់អង្គការណាតូ។ នេះបើយោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុក៕

ដោយ៖ មូល មិនា (ប្រភព៖ ស៊ីនហួ)