AKP ភ្នំពេញ ថ្ងៃទី០៤ ខែមេសា ឆ្នាំ២០២៥ -- ប្រទេសរុស្ស៊ី និងអ៊ុយក្រែនបានចោទប្រកាន់គ្នាទៅវិញទៅមកចំពោះការវាយលុកលើហេដ្ឋារចនាសម្ព័ន្ធថាមពល បើទោះបីជាមានកិច្ចព្រមព្រៀងពីមុនដើម្បីបញ្ឈប់ការវាយប្រហារលើអគារបែបនេះក៏ដោយ។

ក្រសួងការពារជាតិរុស្ស៊ីបាននិយាយថា កងកម្លាំងអ៊ុយក្រែនបានវាយប្រហារលើហេដ្ឋារចនាសម្ព័ន្ធថាមពលរុស្ស៊ីនៅក្នុងតំបន់ឃឺសចំនួន ២ដងក្នុងរយៈពេល ២៤ម៉ោងកន្លងមកនេះ។

ក្រសួងបានរាយការណ៍ថា ការវាយប្រហារដោយយន្តហោះគ្មានមនុស្សបើកមួយលើអង្គភាពថាមពល និងការបាញ់ផ្លោងកាំភ្លើងធំមួយគ្រាប់ទៀតទៅលើកន្លែងប្រតិបត្តិករអគ្គិសនីក្នុងតំបន់។

ទន្ទឹមនឹងនេះដែរ ប្រធានាធិបតីអ៊ុយក្រែន លោក វូឡួឌីមៀ ហ្សេលេនស្គី (Volodymyr Zelensky) បាននិយាយនៅលើបណ្ដាញសង្គមតេឡេក្រាមថា យន្តហោះគ្មានមនុស្សបើករបស់រុស្ស៊ីបានបុកស្ថានីយ៍ក្រោមដីមួយនៅក្នុងតំបន់ស៊ូមីពេញមួយយប់ ខណៈពេលដែលការវាយប្រហារដោយកាំភ្លើងធំបានបំផ្លាញខ្សែថាមពលនៅក្នុងស្រុកនីកូប៉ូល ក្នុងតំបន់ Dnipro ។

បន្ទាប់ពីកិច្ចពិភាក្សាដាច់ដោយឡែករបស់ពួកគេជាមួយគណៈប្រតិភូសហរដ្ឋអាមេរិកកាលពីចុងខែមីនា ប្រទេសរុស្ស៊ី និងអ៊ុយក្រែនបានព្រមព្រៀងគ្នាដើម្បីបង្កើតវិធានការអនុវត្តបទឈប់បាញ់រយៈពេល ៣០ថ្ងៃស្តីពីហេដ្ឋារចនាសម្ព័ន្ធថាមពល៕

ដោយ៖ មូល មិនា (ប្រភព៖ ស៊ីនហួ)