AKP ភ្នំពេញ ថ្ងៃទី០៤ ខែមេសា ឆ្នាំ២០២៥-- ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបតំណាងវេទិកាសេដ្ឋកិច្ចពិភពលោក លោកស្រី Miranda Andruccioli ដើម្បីពិភាក្សាអំពីការគាំទ្ររបស់ក្រសួង លើការធ្វើអង្កេតស្តីពីខ្សែច្រវាក់តម្លៃសកល និងកិច្ចសហការផ្សេងៗ កាលពីថ្ងៃទី០៣ ខែមេសា ឆ្នាំ២០២៥។

ក្នុងកិច្ចប្រជុំនោះ ឯកឧត្តមរដ្ឋមន្ត្រីបានលើកឡើងពីកិច្ចខិតខំប្រឹងប្រែងរបស់កម្ពុជាក្នុងការពង្រឹងភាពប្រកួតប្រជែងនៃវិស័យឧស្សាហកម្ម ខណៈដែលកម្ពុជាត្រៀមខ្លួនចាកចេញពីឋានៈជាប្រទេសអភិវឌ្ឍន៍តិចតួចនៅចុងឆ្នាំ២០២៩ និងបានស្នើឱ្យវេទិកាសេដ្ឋកិច្ចពិភពលោកផ្តល់ជំនួយបច្ចេកទេស និងការវិភាគស៊ីជម្រៅ ពិសេសទាក់នឹងលក្ខខណ្ឌតម្រូវការទីផ្សារ ទន្ទឹមនឹងការប្រែប្រួលនៃខ្សែច្រវាក់ផ្គត់ផ្គង់សកល។

ជាមួយគ្នានេះដែរ លោកស្រី Andruccioli បានជម្រាបជូនអំពីអាណត្តិការងារចម្រុះរបស់វេទិកាសេដ្ឋកិច្ចពិភពលោក ដែលរួមមានកម្មវិធីនិរន្តរភាព ការប្រែប្រួលអាកាសធាតុ កំណើនសេដ្ឋកិច្ច សុខាភិបាល និងអភិបាលកិច្ចបច្ចេកវិទ្យាជាដើម។ ក្រៅពីស្នើសុំឱ្យក្រសួងគាំទ្រលើការធ្វើអង្កេតស្តីពីខ្សែច្រវាក់តម្លៃសកល លោកស្រីក៏បានស្នើសុំឱ្យក្រសួងសហការបន្ថែម ដោយបញ្ជូនមន្ត្រីជំនាញចូលរួមក្នុងការសិក្សា សិក្ខាសាលា និងវេទិកាផ្សេងៗ របស់ខ្លួន។

សូមជម្រាបជូនថា វេទិកាសេដ្ឋកិច្ចពិភពលោក គឺជាអង្គការមិនរកប្រាក់ចំណេញ ដែលកៀរគរការចូលរួមពីមេដឹកនាំនយោបាយ ធុរកិច្ច និងឧស្សាហកម្ម ដើម្បីកំណត់របៀបវារៈអភិវឌ្ឍន៍ក្នុងវិស័យ តំបន់ និងពិភពលោក ដោយផ្តោតលើការកែលម្អស្ថានភាពពិភពលោក៕

ដោយ៖ ពេជ្រ សំអឿន (ប្រភព៖ ក្រសួងឧស្សាហកម្ម)