AKP តាកែវ ថ្ងៃទី៤ ខែមេសា ឆ្នាំ២០២៥ -- លោក សំ គឹមសុង អនុប្រធានមន្ទីរអភិវឌ្ឍន៍ជនបទខេត្តតាកែវ និងលោក កែវ សុខឿន ជំទប់ទី១ ឃុំត្រាំកក់ បានចូលរួមជាអធិតីក្នុងពិធីបើកវគ្គបណ្ដុះបណ្ដាលពង្រឹងសមត្ថភាពគណៈកម្មាធិការអភិវឌ្ឍន៍ភូមិ (គ.អ.ភ) នៅឃុំត្រាំកក់ ស្រុកត្រាំកក់ ខេត្តតាកែវ នាថ្ងៃពុធ ៥កើត ខែចេត្រ ឆ្នាំរោងឆស័កពុទ្ធសករាជ ២៥៦៨ ត្រូវនឹងថ្ងៃទី២ ខែមេសា ឆ្នាំ២០២៥។

វគ្គបណ្តុះបណ្តាលនេះរៀបចំឡើងដោយនាយកដ្ឋានអភិវឌ្ឍន៍សហគមន៍ តាមរយៈថវិកាកម្មវិធីប្រចាំឆ្នាំ២០២៥ ដែលមានសិក្ខាកាមចូលរួមសរុបចំនួន ២៦នាក់ (ស្រី ៤នាក់) ជាគណៈកម្មាធិការអភិវឌ្ឍន៍ភូមិ (គ.អ.ភ) មកពី ១៣ភូមិនៃឃុំត្រាំកក់ ដែលរួមមាន ភូមិត្រពាំងចក ភូមិយាយឡ ភូមិជ្រែត្នោត ភូមិត្រពាំងរំពាក់ ភូមិនៀល ភូមិត្រពាំងកែស ភូមិគល់គម ភូមិអង្គរនាប ភូមិត្រពាំងឫស្សី ភូមិបឹងម្កាក់ ភូមិគ្រាំងគរ ភូមិថ្មកែវ និងភូមិត្រពាំងខ្លូត។

សូមជម្រាបថា ការបណ្ដុះបណ្ដាលគណៈកម្មាធិការអភិវឌ្ឍន៍ភូមិ (គ.អ.ភ) នេះក្នុងគោលបំណងពង្រឹងសមត្ថភាពភាពគណៈកម្មាធិការអភិវឌ្ឍន៍ភូមិ (គ.អ.ភ) ដើម្បីបង្កើនប្រសិទ្ធភាពការដឹកនាំការងារអភិវឌ្ឍន៍ភូមិដោយសហគមន៍ តាមរយៈគណៈកម្មាធិការអភិវឌ្ឍន៍ភូមិ (គ.អ.ភ) ពីព្រោះភូមិត្រពាំងចក ឃុំត្រាំកក់ ត្រូវបានជ្រើសរើសជាគោលដៅ “ភូមិគំរូគន្លឹះ” របស់ក្រសួងអភិវឌ្ឍន៍ជនបទ សម្រាប់ឆ្នាំ២០២៥ និងជាគោលដៅត្រី-វិស័យ កសិកម្ម-ទឹក-ជនបទ៕

ដោយ: ពេជ្រ សំអឿន (ប្រភព: ក្រសួងអភិវឌ្ឍន៍ជនបទ)