AKP ភ្នំពេញ ថ្ងៃទី៤ ខែមេសា ឆ្នាំ២០២៥--ក្នុងឱកាសអបអរសាទរទិវាសំពោចពិភពលោកថ្ងៃទី០៤ ខែមេសា ឆ្នាំ២០២៥ នេះ អង្គការសម្ព័ន្ធមិត្តសត្វព្រៃ Wildlife បានលើកឡើងថា យើងរួមគ្នាការពារប្រភេទសត្វដ៏ស្លូតត្រង់នេះពីទារុណកម្មយង់ឃ្នង និងធានាថា សំពោចអាចបន្តរស់រានមានជីវិតដោយមានសុវត្ថិភាពក្នុងព្រៃធម្មជាតិទៅថ្ងៃអនាគត។ 

ក្មុងទិវានេះ អង្គការ Wildlife សូមបង្ហាញអំពី សំពោចក្រអូបដែលជាប្រភេទថនិកសត្វមានមាឌតូច និងមានវត្តមានរស់នៅតាមតំបន់ដីគោកទូទាំងតំបន់អាស៊ីអាគ្នេយ៍ រួមទាំងប្រទេសកម្ពុជាផងដែរ។ សំពោចក្រអូប គឺជាសត្វដែលមានសារៈសំខាន់ ដោយសារពួកវាជួយដល់ព្រៃឈើតាមរយៈការពង្រាយគ្រាប់ពូជ និងទ្រទ្រង់ដល់ជីវៈចម្រុះ។ យ៉ាងណាមិញ ប្រភេទនេះកំពុងស្ថិតក្នុងគ្រោះថ្នាក់ធ្ងន់ធ្ងរ។ ជម្រកពួកវាត្រូវបានបំផ្លាញដោយសារការកាប់ព្រៃឈើ និងការយកដីព្រៃធ្វើកសិកម្ម។ សំពោចក្រអូបស្ថិតក្នុងក្រុមប្រភេទមានដោយបង្គួរ និងមានចុះក្នុងបញ្ជីក្រហម IUCN (LC) ថាជាប្រភេទរងគ្រោះថ្នាក់តិចតួច ។

សំពោចជាច្រើនក្បាលត្រូវបានចាប់យកធ្វើអាជីវកម្មជាសត្វចិញ្ចឹម និងឧស្សាហកម្មកាហ្វេ (កាហ្វេលាមកសំពោច)។ ពួកគេត្រូវរស់នៅក្នុងស្ថានភាពមិនល្អ ឃុំក្នុងទ្រុងតូចៗ និងបង្ខំឱ្យស៊ីគ្រាប់កាហ្វេ ដែលកត្តាទាំងនេះធ្វើឱ្យពួកគេស្ត្រេស និងមានសុខភាពមិនល្អ។ 

ការជួញដូរសត្វព្រៃកាន់តែមានស្ថានភាពអាក្រក់ទៅៗ ដោយសារតែមនុស្សជានិច្ចកាលតែងតែចាប់សំពោចយកទៅលក់ធ្វើជាសត្វចិញ្ចឹម ឬធ្វើជាអាហារ។ ប្រសិនយើងមិនចាត់វិធានការនោះទេ ចំនួនសំពោចនឹងបន្តធ្លាក់ចុះ ដែលនេះពិតជាបង្កគ្រោះថ្នាក់ដល់ព្រៃឈើរបស់យើង៕

ដោយ: ណយ នឿន (ប្រភព៖ Wildlife)