AKP កំពង់ស្ពឺ ថ្ងៃទី០៣ ខែមេសា ឆ្នាំ២០២៥-- លោក ជេត ដុំ នាយករងរដ្ឋបាលខេត្តកំពង់ស្ពឺ តំណាងដ៏ខ្ពង់ខ្ពស់ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ អញ្ជើញដឹកនាំកិច្ចប្រជុំក្រុមការងារចម្រុះថ្នាក់ខេត្ត ដើម្បីចុះពិនិត្យទីតាំងជាក់ស្តែង និងរកដំណោះស្រាយបញ្ចៀសការលិចទឹកជាអចិន្ត្រៃយ៍ ក្នុងបរិវេណវិទ្យាល័យហ៊ុនសែនអង្គរមេត្រីនៅជាប់ផ្លូវជាតិលេខ៤១ ស្ថិតនៅភូមិអង្គមេត្រី ឃុំរលាំងគ្រើល ស្រុកសំរោងទង ខេត្តកំពង់ស្ពឺ។

លោក ជេត ដុំ បានមានមតិថា ដោយទទួលបានការចាត់តាំងពីឯកឧត្តមបណ្ឌិតអភិបាលខេត្ត  ដឹកនាំក្រុមការងារចម្រុះថ្នាក់ខេត្ត ដើម្បីចុះពិនិត្យទីតាំងជាក់ស្តែង និងរកដំណោះស្រាយបញ្ចៀសការលិចទឹកជាអចិន្ត្រៃយ៍ ក្នុងបរិវេណវិទ្យាល័យហ៊ុនសែនអង្គមេត្រី។ បន្ទាប់ពីពិនិត្យវត្តមាន និងចុះបញ្ជីវត្តមានគ្រប់សមាសភាពអ្នកចូលរួមរួចមក ក្រុមការងារបានបន្តដំណើរចុះពិនិត្យទីតាំងជាក់ស្តែងចាប់ពីចំណុចផ្សារអង្គមេត្រី ខាងត្បូង អមសងខាងផ្លូវជាតិលេខ៤១ រហូតដល់ផ្លូវចូលសាលាឃុំសែនដី។

វិទ្យាល័យអង្គមេត្រី ស្ថិតនៅភូមិអង្គមេត្រី ឃុំរលាំងគ្រើល ស្រុកសំរោងទង ខេត្តកំពង់ស្ពី កំពុងរងការជន់លិចដោយទឹក ប្រភពចេញពីលូតាមដងផ្លូវជាតិលេខ៤១បែកខាងលើដែលមានប្រភពចេញពីរោងចក្រជាច្រើន បង្កក្លិនស្អុយសាយភាយពេញក្នុងសាលា ដែលបង្កផលប៉ះពាល់យ៉ាងធ្ងន់ធ្ងរចំពោះសុខភាព លោកគ្រូ អ្នកគ្រូ និងសិស្សានុសិស្សនៅទីនោះ។ ម៉្យាងទៀតប្រសិនទុកទឹកឱ្យដក់យូរគ្មានចំណាត់ការនោះបណ្តាលឱ្យខូចខាតយ៉ាងធ្ងន់ធ្ងរដល់បេតុងគ្រឹះសាលា និងជញ្ជាំងសាលាផងដែរ៕

ដោយ លឹម សាន្ត