AKP ភ្នំពេញ ថ្ងៃទី០៣ ខែមេសា ឆ្នាំ២០២៥-- ឯកឧត្តមបណ្ឌិត ហង្ស សាមឿន អនុប្រធានទី២ គណៈកម្មាធិការជាតិគ្រប់គ្រងគ្រោះមហន្តរាយ បានស្នើសុំឱ្យអង្គការវ័តធ័រអេតកម្ពុជាផ្តល់ការគាំទ្រជួយដល់ក្រុមងាយរងគ្រោះក្នុងហេតុការណ៍រលកកម្តៅដែលអាចនឹងកើតឡើង ដោយផ្តោតលើសិស្សសាលា កុមារ មនុស្សចាស់ និងអ្នកធ្វើការក្នុងសេដ្ឋកិច្ចក្រៅប្រព័ន្ធ (កម្មករ និងអ្នកលក់ដូរតាមផ្លូវ)។ ការស្នើសុំរបស់ឯកឧត្តមបណ្ឌិត ហង្ស សាមឿន បានធ្វើឡើងក្នុងជំនួបពិភាក្សាការងារជាមួយលោក ឆាត់ សុភាព នាយកប្រចាំកម្ពុជានៃអង្គការវ័តធ័រអេតកម្ពុជា កាលពីថ្ងៃទី០២ ខែមេសា ឆ្នាំ២០២៥។

ក្នុងជំនួបនេះ លោក ឆាត់ សុភាព បានជម្រាបជូនឯកឧត្តមបណ្ឌិត ហង្ស សាមឿន ថា វ័តធ័រអេត គឺជាអង្គការអន្តរជាតិផ្តោតលើការផ្តល់ជូនទឹកស្អាត និងអនាម័យដល់ប្រជាជនក្រីក្រនៅតាមតំបន់ដាច់ស្រយាល ដោយនៅកម្ពុជាអង្គការនេះធ្វើការជាមួយដៃគូនានាដោយមានកិច្ចគាំទ្រពីស្ថាប័នជាតិ ដើម្បីធានាថាប្រជាជនមានសិទ្ធិប្រើប្រាស់សេវាទឹកស្អាត និងអនាម័យប្រកបដោយចីរភាព។

ទន្ទឹមនឹងនេះ ឯកឧត្តមបណ្ឌិត ហង្ស សាមឿន បានកោតសរសើរ និងវាយតម្លៃខ្ពស់ចំពោះអង្គការវ័តធ័រអេតដែលបានចាប់ផ្ដើមធ្វើសកម្មភាពនៅកម្ពុជាចាប់ពីឆ្នាំ២០១៧ ដោយបានជួយដល់ប្រជាជនក្នុងតំបន់ដាច់ស្រយាល ជាពិសេសនៅខេត្តកំពង់ធំ ព្រះវិហារ និងតាកែវ៕ 

ដោយ៖ ចាន់ សុភឿន