AKP ភ្នំពេញ ថ្ងៃទី០៣ ខែមេសា ឆ្នាំ២០២៥ -- អនុប្រធានាធិបតីចិន លោកហាន់ ហ្សេង (Han Zheng) បានជួបជាមួយ លោក រយ ចាកូបស៍ (Roy Jakobs) នាយកប្រតិបត្តិក្រុមហ៊ុន Royal Philips ក្នុងទីក្រុងប៉េកាំង។

ដោយកត់សម្គាល់ថា ទាំងប្រទេសចិន និងហូឡង់គឺជាប្រទេសដែលមានសេដ្ឋកិច្ចបើកចំហ លោក ហាន់ បាននិយាយថា ប្រទេសទាំងពីរគឺជាអ្នកតស៊ូមតិ អ្នកផ្សព្វផ្សាយ និងអ្នកទទួលផលនៃសកលភាវូបនីយកម្មសេដ្ឋកិច្ច។

លោក ហាន់ បាននិយាយថា ប្រទេសចិនប្តេជ្ញាក្នុងការកសាងសេដ្ឋកិច្ចពិភពលោកបើកចំហ ដើម្បីលើកកម្ពស់កិច្ចសហប្រតិបត្តិការសេដ្ឋកិច្ច និងពាណិជ្ជកម្មចិន-ហូឡង់ និងចិន-សហភាពអឺរ៉ុប និងបង្កើតឱកាសអភិវឌ្ឍន៍ថ្មីសម្រាប់សាជីវកម្មពហុជាតិ។

លោកបានស្វាគមន៍ក្រុមហ៊ុន Royal Philips ដើម្បីបន្តវាយលុកទីផ្សារចិន ពង្រីកការវិនិយោគ R&D នៅក្នុងប្រទេស និងដើរតួនាទីយ៉ាងសកម្មក្នុងការលើកកម្ពស់ការអភិវឌ្ឍប្រកបដោយស្ថិរភាពនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មចិន-សហភាពអឺរ៉ុប។

លោក ចាកូបស៍ បាននិយាយថា ក្រុមហ៊ុន Royal Philips មានសុទិដ្ឋិនិយមចំពោះទស្សនវិស័យអភិវឌ្ឍន៍សេដ្ឋកិច្ច និងឱកាសទីផ្សាររបស់ប្រទេសចិន ហើយនឹងបន្តអនុវត្តតាមយុទ្ធសាស្ត្រអភិវឌ្ឍន៍រយៈពេលវែងរបស់ខ្លួននៅក្នុងប្រទេសចិន និងជំរុញការផ្លាស់ប្តូរ និងកិច្ចសហប្រតិបត្តិការរវាងប្រទេសទាំងពីរ៕

ដោយ៖ មូល មិនា (ប្រភព៖ ភីបផលដេលី)