AKP ភ្នំពេញ ថ្ងៃទី០៣ ខែមេសា ឆ្នាំ២០២៥ -- ការហ្វឹកហ្វឺនកងទ័ពជើងទឹករួមគ្នារវាងប្រទេសចិន និងថៃ ដែលមានឈ្មោះថា Blue Strike-2025 បានបញ្ចប់កាលពីថ្ងៃពុធ នៅទីក្រុងហ្សានជាំង ខេត្តក្វាងទុង ភាគខាងត្បូងប្រទេសចិន។

សមយុទ្ធ​រួម​រយៈពេល​ ៨​ថ្ងៃ​ដែល​ស្ថិតក្រោម​ប្រធានបទ​«​ប្រឆាំង​ភេរវកម្ម​នៅ​ដែនសមុទ្រ​និង​ជំនួយ​សង្គ្រោះ​គ្រោះមហន្តរាយ​» មាន​ការចូលរួម​ពី​នាវា​កងទ័ពជើងទឹក ​និង​អង្គភាព​សមុទ្រ​មកពី​ភាគី​ទាំងពីរ​។

វគ្គបណ្តុះបណ្តាលនេះគ្របដណ្តប់លើមុខវិជ្ជាជាច្រើន រួមទាំងប្រតិបត្តិការវាយប្រហារដែនសមុទ្ររួមគ្នា ការស្វែងរក និងជួយសង្គ្រោះតាមសមុទ្រ។លើសពីនេះ ភាគីទាំងពីរបានធ្វើការពិភាក្សា ផ្លាស់ប្តូរសកម្មភាព ទស្សនកិច្ចទៅវិញទៅមក និងព្រឹត្តិការណ៍វប្បធម៌ និងកីឡា។

នេះ​ជា​លើក​ទី​៦ ​នៃ​ការ​ហ្វឹកហ្វឺន​រួម​គ្នា​ដែល​រៀបចំ​ដោយប្រទេស​ចិននិង​ថៃ។ តាមរយៈការហ្វឹកហ្វឺននេះ កងទ័ពជើងទឹកទាំងពីរបានបង្កើនសមត្ថភាពប្រយុទ្ធ និងកិច្ចសហប្រតិបត្តិការរបស់ពួកគេ ដោយដាក់មូលដ្ឋានគ្រឹះដ៏រឹងមាំសម្រាប់ការធ្វើឱ្យស៊ីជម្រៅកិច្ចសហប្រតិបត្តិការយោធា និងការពង្រឹងមិត្តភាព និងការជឿទុកចិត្តគ្នាទៅវិញទៅមក៕

ដោយ៖ មូល មិនា (ប្រភព៖ ភីបផលដេលី)