AKP ភ្នំពេញ ថ្ងៃទី០២ ខែមេសា ឆ្នាំ២០២៥--

គណៈកម្មាធិការជាតិលើកកម្ពស់សីលធម៌សង្គម តម្លៃស្រ្តី និងគ្រួសារខ្មែរ បានរៀបចំកិច្ចប្រជុំបូកសរុបការងារប្រចាំឆ្នាំ២០២៤ និងលើកទិសដៅការងារឆ្នាំ២០២៥ នៅ SUN&MOON  Riverside Hotel នាព្រឹកថ្ងៃទី០២ ខែមេសា ឆ្នាំ២០២៥ ក្រោមអធិបតីភាពលោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី និងជាប្រធានគណៈកម្មាធិការជាតិលើកកម្ពស់សីលធម៌សង្គម តម្លៃស្រ្តី និងគ្រួសារខ្មែរ ដើម្បីឆ្លុះបញ្ចាំងនិងពិនិត្យមើលសមិទ្ធផលការងារដែលសម្រេចបានសំខាន់ៗ ចំណុចខ្លាំង កាលានុវត្តភាពនានា បញ្ហាប្រឈម មេរៀនបទពិសោធន៍ និងលើកទិសដៅការងារដើម្បីអនុវត្តបន្ត។ បច្ចុប្បន្ន ស្ត្រីបានដើរតួនាទីយ៉ាងសំខាន់ ជាឆ្អឹងខ្នងនៃសេដ្ឋកិច្ចនិងសង្គមជាតិ ចូលរួមអភិវឌ្ឍប្រទេសជាតិឱ្យមានការរីកចម្រើន ដែលរាជរដ្ឋាភិបាលបានយកចិត្តទុកដាក់ខ្ពស់បំផុត។

ការលើកកម្ពស់សមភាពយេនឌ័រ និងបង្កើនភាពអង់អាចដល់ស្រ្តីនៅកម្ពុជារយៈពេល៥ឆ្នាំ(២០២៤-២០២៨) ក្នុងនោះចំណុចសំខាន់ៗនៅក្នុងនារីរតនៈ គឺការលើកកម្ពស់សីលធម៌សង្គម តម្លៃស្រ្តី និងគ្រួសារខ្មែរ ពង្រឹង និងបង្កើនកិច្ចសហការក្នុងការអប់រំអំពីសីលធម៌និងសុជីវធម៌ដល់សិស្ស និស្សិត និងយុវជន ទាំងក្នុងនិងក្រៅប្រព័ន្ធអប់រំ រួមទាំងការបន្តលើកកម្ពស់ការគោរពសីលធម៌ តម្លៃស្រ្តី និងសេចក្តីថ្លៃថ្នូរក្នុងគ្រួសារនិងសង្គមខ្មែរ។ គណៈកម្មាធិការជាតិនឹងដឹកនាំ និងសម្របសម្រួលក្នុងការរៀបចំផែនទីបង្ហាញផ្លូវ ដើម្បីបណ្តុះទម្លាប់មានសីលធម៌ គុណធម៌ និងសុជីវធម៌ និងទម្លាប់គោរពច្បាប់និងវិន័យ ដោយបញ្ចូលការអប់រំអំពីព្រះពុទ្ធសាសនា និងផ្នែកសិល្បៈ វប្បធម៌ខ្មែរ ទាំងរូបីនិងអរូបី ទៅក្នុងកម្មវិធីសិក្សាគ្រប់កម្រិត ព្រមទាំងផ្សព្វផ្សាយនិងបញ្ជ្រាបទៅគ្រប់ក្រសួង-ស្ថាប័ន ទាំងថ្នាក់ជាតិនិងថ្នាក់ក្រោមជាតិ។ សិក្សាស្រាវជ្រាវ និងពិគ្រោះយោបល់ដោយទូលំទូលាយក្នុងការរៀបចំកញ្ចប់កម្មវិធីនិងមាតិកាអប់រំផ្សព្វផ្សាយ (Package of Media Content & Programs) ស្តីពីការលើកកម្ពស់សីលធម៌សង្គម តម្លៃស្រ្តី និងគ្រួសារខ្មែរ នៅក្នុងបរិបទសង្គមដែលមានអារ្យធម៌ខ្ពស់។ បន្តអនុវត្តកម្មវិធីចិញ្ចឹមកូនតាមបែបវិជ្ជមាន និងកម្មវិធីទារកដ្ឋាននៅកន្លែងធ្វើការ ទាំងនៅតាមគ្រឹះស្ថានសាធារណៈនិងឯកជនទាំងនៅថ្នាក់ជាតិនិងក្រោមជាតិ រួមទាំងការលើកកម្ពស់ទំនាក់ទំនងអន្តរជំនាន់ ដើម្បីបង្កើនសុខុមាលភាពគ្រួសារនិងសង្គម៕

ដោយ ពេជ្រ សំអឿន