AKP ភ្នំពេញ ថ្ងៃទី០២ ខែមេសា ឆ្នាំ២០២៥-- 

មន្ដ្រីជាន់ខ្ពស់រដ្ឋបាលរាជធានីភ្នំពេញជំរុញឱ្យមន្ទីរសុខាភិបាល ត្រូវបង្កើន និងពង្រឹងសមត្ដភាព បុគ្គលិកគ្រូពេទ្យបន្ថែមទៀត ដើម្បីធានាការថែទាំ ព្យាបាលជូន អ្នកជំងឺមានប្រសិទ្ធភាព។ ឯកឧត្ដម អ៊ីមរ៉ន ហាស្សាន់ អភិបាលរងរាជធានីភ្នំពេញ តំណាងឯកឧត្ដម ឃួង ស្រេង អភិបាលរាជធានីភ្នំពេញ បានជំរុញបែបនេះក្នុងពិធីបើកសន្និបាតបូកសរុបលទ្ធផលការងារប្រចាំឆ្នាំ២០២៤ និងទិសដៅការងារ២០២៥ នាថ្ងៃទី០២ ខែមេសា ឆ្នាំ២០២៥ នៅសាលារាជធានីភ្នំពេញ។

ឯកឧត្ដមបានមានប្រសាសន៍ថា តាមរយៈសមិទ្ធផលការងារឆ្នាំ២០២៤ របស់មន្ទីរសុខាភិបាល នៃរដ្ឋបាលរាជធានីភ្នំពេញ គឺពិតជាបានបង្ហាញឱ្យឃើញពីភាពរីកចម្រើន លើវិស័យសុខាភិបាល នៅរាជធានីភ្នំពេញ ទាំងលើការផ្តល់សេវា ក៏ដូចជាផ្នែកហេដ្ឋារចនាសម្ព័ន្ធរូបវ័ន្តផងដែរ។ ជាក់ស្តែងយើងបានឃើញថា ការសម្រាលកូននៅមូលដ្ឋានសុខាភិបាលសាធារណៈ ការផ្តល់សេវាពន្យាកំណើត ការពិនិត្យផ្ទៃពោះមុនសម្រាលដោយបុគ្គលិកសុខាភិបាល កុមារអាយុ ក្រោម១ឆ្នាំ ទទួលថ្នាំបង្ការជំងឺរបេង និងវ៉ាក់សាំងការពារជំងឺកញ្ជ្រោល បានកើនឡើងជាលំដាប់។ ការគ្រប់គ្រងសេវាសុខាភិបាលឯកជន និងឱសថស្ថានឯកជនត្រូវបានពង្រឹង ឱសថស្ថាន-ឱសថស្ថានរងមន្ទីរពហុព្យាបាល មន្ទីរសំរាកព្យាបាល និងបន្ទប់ពិគ្រោះព្យាបាល ជំងឺត្រូវបានត្រួតពិនិត្យជាទៀងទាត់ រៀងរាល់ខែ។ ការរីកចម្រើនទាំងអស់នេះ គឺច្បាស់ណាស់ កើតចេញមកពីកិច្ចសហការល្អរវាងក្រសួងសុខាភិបាល រដ្ឋបាលរាជធានីភ្នំពេញ អាជ្ញាធរខណ្ឌ-សង្កាត់ និងអង្គការដៃគូអភិវឌ្ឍន៍វិស័យសុខាភិបាលនានា ដែលជាកត្តាដ៏សំខាន់ក្នុងការអភិវឌ្ឍ វិស័យសុខាភិបាល នៅក្នុងរាជធានីភ្នំពេញ។

ទន្ទឹមនឹងនេះ លោក ងី មានហេង ប្រធានមន្ទីរសុខាភិបាលនៃរដ្ឋបាលរាជធានីភ្នំពេញ បានលើកឡើងថា មន្ទីរសុខាភិបាលរាជធានីភ្នំពេញមានមន្ទីរពេទ្យបង្អែករាជធានីភ្នំពេញ១ ការិយាល័យស្រុកប្រតិបត្តិចំនួន០៧ ដែលមានមន្ទីរពេទ្យបង្អែកកម្រិត CPA1 ចំនួន០៧ មណ្ឌលសុខភាពចំនួន៤៦ និងប៉ុស្តិ៍សុខភាពចំនួន ៥ទីតាំង និងមានមន្ត្រី និងបុគ្គលិកសុខាភិបាលចំនួន ១.៣៨៤រូប (ស្ត្រីចំនួន ៧៨៩រូប)។ មូលដ្ឋានសុខាភិបាលសាធារណៈនៅរាជធានីភ្នំពេញ មានគ្រែសរុបចំនួន ៤៥៤គ្រែ បានទទួល ពិនិត្យពិគ្រោះជំងឺជូនប្រជាពលរដ្ឋចំនួនសរុប៤៧០.៩៥៤ករណី។

លោកប្រធានមន្ទីរបានបញ្ជាក់ថា នៅក្នុងឆ្នាំ២០២៤ រាជធានីភ្នំពេញទទួលបានជោគជ័យលើការអនុវត្តសកម្មភាពឆ្លើយតបទៅនឹងគោលដៅសកលនៃជំងឺអេដស៍ ពោលគឺ៩៥% ទី១ ដោយសម្រេចបាន១២១% ៩៥% ទី២ សម្រេច បាន ៩៩% និង៩៥%ទី៣ សម្រេចបាន ៩៩%។ មណ្ឌលសុខ ភាពចំនួន៤៥ និងមន្ទីរពេទ្យបង្អែកចំនួន០៨ បាននឹងកំពុងផ្តល់សេវាពិនិត្យ ព្យាបាលជំងឺរបេងតាមរយៈដូតស៍សហគមន៍ ចំណែកឯការអនុវត្តសកម្មភាពកម្មវិធីរបេង-អេដស៍ មាននៅគ្រប់ស្រុកប្រតិបត្តិទាំងអស់។ រីឯជំងឺគ្រុនឈាមរាយការណ៍ សរុបមានចំនួន ២,៦៥៤ករណី និងករណីស្លាប់ចំនួន០១នាក់។ ចំនួនករណីជំងឺគ្រុនឈាមមានការថយចុះប្រមាណជិតពាក់កណ្តាល បើប្រៀបធៀបនឹងឆ្នាំ២០២៣ ដែលមានចំនួន ៤,៦៦៩ករណី។ ដោយឡែក ចំពោះកម្មវិធីគ្រប់គ្រង ជំងឺមិនឆ្លង (ជំងឺទឹកនោមផ្អែម និងជំងឺលើសសម្ពាធឈាម) មន្ទីរបានធ្វើការបណ្តុះបណ្តាលមន្ត្រី មណ្ឌលសុខភាពចំនួន ៩០នាក់ និងអ្នកស្ម័គ្រចិត្តភូមិចំនួន ១.៩០៦នាក់។ ប្រជាពលរដ្ឋដែលមាន អាយុចាប់ពី៤០ឆ្នាំឡើង ទៅរស់នៅក្នុងតំបន់គ្របដណ្តប់របស់មណ្ឌលសុខភាព បានទទួលសេវា ពិនិត្យស្រាវជ្រាវរកជំងឺទឹកនោមផ្អែម និងជំងឺលើសសម្ពាធឈាមមានចំនួន ១៩.៨៧២នាក់ (ស្រី ចំនួន ១៣.៣១៤នាក់)។ ក្នុងចំណោមប្រជាជនទាំងនោះ បានរកឃើញអ្នកជំងឺដែលបានធ្វើរោគវិនិច្ឆ័យ ថាមានទាំងជំងឺទឹកនោមផ្អែម និងលើសសម្ពាធឈាមមានចំនួន ៩.០១៥នាក់ អ្នកមានតែជំងឺទឹក នោមផ្អែមមានចំនួន ៣.៥៨០នាក់ និងអ្នកដែលរកឃើញថាមានជំងឺលើសសម្ពាធឈាមសរុបចំនួន ៣.៨៦៩ នាក់។

ដោយឡែក ចំពោះការស្រាវជ្រាវរកជំងឺមហារីកសុដន នៅក្នុងឆ្នាំ២០២៤ បានរកឃើញស្ត្រី មានបញ្ហាមានដុំដោះចំនួន ១៦នាក់ ស្មើនឹង០,០៣% និងបានបញ្ជូនទៅស្រាវជ្រាវបន្តទៀតនៅមន្ទីរ ពេទ្យថ្នាក់ជាតិមានចំនួន ០៧នាក់។ រីឯទីតាំងផ្តល់សេវាពិនិត្យស្រាវជ្រាវ និងព្យាបាលជំងឺមហារីក មាត់ស្បូនមានចំនួន ៣៤កន្លែង ក្នុងនោះនៅមន្ទីរពេទ្យបង្អែក ចំនួន០៨កន្លែង និងមណ្ឌលសុខភាព ចំនួន ២៧កន្លែង។ ភ្ជាប់ជាមួយគ្នានឹងសកម្មភាពការងារនៅមន្ទីរពេទ្យ និងមណ្ឌលសុខភាព មន្ទីរក៏បានសម្រប សម្រួលរៀបចំកិច្ចប្រជុំប្រចាំខែ រវាងក្រុមការងារបច្ចេកទេសសុខាភិបាលថ្នាក់រាជធានី ជាមួយនឹង អង្គការដៃគូអភិវឌ្ឍន៍វិស័យសុខាភិបាលបានចំនួន ១២លើក និងបានសម្របសម្រួលឱ្យអង្គការ ដៃគូអភិវឌ្ឍន៍ចំនួន ១៥អង្គការ ចុះអនុស្សារណៈយោគយល់គ្នា (ទាំងថ្មី និងបន្ត) ជាមួយក្រសួង សុខាភិបាលផងដែរ។

មន្ទីរសុខាភិបាលបានគ្រប់គ្រង និងសម្របសម្រួលក្នុងការអនុញ្ញាតបើកថ្មី និងបន្តសុពលភាពនូវមន្ទីរពេទ្យឯកជន មន្ទីរសម្រាកព្យាបាល មណ្ឌលកែសម្ផស្ស មន្ទីរព្យាបាលមាត់ធ្មេញ មន្ទីរពិសោធន៍វេជ្ជសាស្ត្រ បន្ទប់ពិគ្រោះ ព្យាបាលជំងឺទូទៅ បន្ទប់ពិគ្រោះជំងឺមាត់-ធ្មេញ និងបន្ទប់ពិគ្រោះស្ត្រីមានផ្ទៃពោះ។ល។ គិតត្រឹមខែ ធ្នូឆ្នាំ២០២៤ ចំនួនមូលដ្ឋានសុខាភិបាលឯកជនមានចំនួនសរុប ៤,៤៤៦ កន្លែង (កម្រិតមន្ទីរសម្រាក ព្យាបាលចំនួន ៥៤៦កន្លែង (កើន៥៧កន្លែង ធៀបនឹងឆ្នាំ២០២៣) និងកម្រិតបន្ទប់ថែទាំ បន្ទប់ពិគ្រោះ ព្យាបាលជំងឺ ចំនួន ៣,៩០០កន្លែង (កើន៥៨១កន្លែង ធៀបនឹងឆ្នាំ២០២៣)។ ម្ចាស់ទីតាំងបានស្នើសុំបិទដោយស្មគ្រ័ចិត្តចំនួន២៨ទីតាំង និងទីតាំងចំនួន០៤ ត្រូវបានផ្អាក (សរុប ៣២ទីតាំង)៕

ដោយ សួស សំរិត