AKP បន្ទាយមានជ័យ ថ្ងៃទី០២ ខែមេសា ឆ្នាំ២០២៥--អាជ្ញាធរមូលដ្ឋាន និងមន្ត្រីជំនាញពាក់ព័ន្ធ បានរួមគ្នាប្រារព្ធពិធីទទួលបងប្អូនពលករខ្មែរ ដែលបានធ្វើដំណើរត្រឡប់មកពីប្រទេសថៃ ដើម្បីមកជួបជុំក្រុមគ្រួសារ និងអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរនាពេលខាងមុខ នៅគោលដៅបែបបទចូលប្រទេសនៃប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែតខេត្តបន្ទាយមានជ័យ ហាក់មានភាពកក់ក្តៅ និងសប្បាយរីករាយជាពិសេស។

ក្នុងឱកាសដ៏សំខាន់នេះ ប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត បានរៀបចំវត្ថុអនុស្សាវរីយ៍ជាច្រើន រួមមាន ក្រមាទឹកសុទ្ធ និងនំប៉័ង ដើម្បីចែកជូនដល់បងប្អូនពលករម្នាក់ៗដែលបានឆ្លងកាត់ព្រំដែនត្រឡប់មកមាតុភូមិវិញ។ ពិធីទទួលពលករ និងចែកវត្ថុអនុស្សាវរីយ៍នេះ មានកិត្តិយសអញ្ជើញចូលរួមពី ឯកឧត្ដម សាន គឹមហុង អនុរដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ ឧត្ដមសេនីយ៍ត្រី អុី ចំរើន នាយប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត និងក្រុមការងារមកពីក្រសួង ព្រមទាំងមន្ទីរអង្គភាពពាក់ព័ន្ធនានា និងអាជ្ញាធរក្រុងប៉ោយប៉ែតផង កាលពីថ្ងៃអង្គារ ទី០១ ខែមេសា ឆ្នាំ២០២៥នេះ។

ក្នុងឱកាសនោះឯកឧត្ដម សាន គឹមហុង បានមានប្រសាសន៍ថា នេះគឺជាកាយវិការដ៏កក់ក្តៅមួយដែលបង្ហាញពីការយកចិត្តទុកដាក់របស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រី ក្នុងការគិតគូរដល់បងប្អូនពលករខ្មែរដែលបានខិតខំធ្វើការនៅក្រៅប្រទេស។ វត្ថុអនុស្សាវរីយ៍តិចតួចទាំងនេះ គឺជាការលើកទឹកចិត្ត និងជាការស្វាគមន៍ចំពោះការវិលត្រឡប់មកជួបជុំក្រុមគ្រួសារក្នុងឱកាសបុណ្យចូលឆ្នាំថ្មីប្រពៃណីជាតិ។ ឯកឧត្ដមក៏បានផ្ដាំផ្ញើដល់បងប្អូនពលករទាំងអស់ សូមធ្វើដំណើរប្រកបដោយសុវត្ថិភាព និងរីករាយជាមួយក្រុមគ្រួសារក្នុងឱកាសបុណ្យចូលឆ្នាំថ្មីដែលនឹងចូលមកដល់នៅពាក់កណ្តាលខែមេសាឆ្នាំ២០២៥ខាងមុខនេះ។

ជាមួយគ្នានោះដែរ លោក ឧត្ដមសេនីយ៍ត្រី អ៊ី ចំរើន បានថ្លែងថា កម្លាំងនគរបាលច្រកទ្វារព្រំដែនអន្តរជាតិប៉ោយប៉ែត បានសហការយ៉ាងជិតស្និទ្ធជាមួយមន្ត្រីជំនាញពាក់ព័ន្ធ ដើម្បីសម្រួលដល់ការធ្វើដំណើរឆ្លងកាត់ព្រំដែនរបស់បងប្អូនពលករឱ្យបានឆាប់រហ័ស និងប្រកបដោយភាពងាយស្រួល។ ការរៀបចំវត្ថុអនុស្សាវរីយ៍នេះ គឺជាគំនិតផ្ដួចផ្ដើមមួយដើម្បីបង្ហាញពីទឹកចិត្តរាក់ទាក់ និងការស្វាគមន៍ចំពោះបងប្អូនពលករដែលបានលះបង់កម្លាំងកាយចិត្តធ្វើការនៅប្រទេសក្រៅ ហើយពេលនេះបានវិលត្រឡប់មកជួបជុំគ្រួសារវិញ។ លោកក៏បានជូនពរដល់បងប្អូនពលករទាំងអស់ ឱ្យមានសុខភាពល្អ សុវត្ថិភាពក្នុងការធ្វើដំណើរ និងរីករាយក្នុងឱកាសបុណ្យចូលឆ្នាំថ្មី។

បងប្អូនពលករដែលបានទទួលវត្ថុអនុស្សាវរីយ៍បានសម្ដែងនូវអារម្មណ៍សប្បាយរីករាយ និងថ្លែងអំណរគុណយ៉ាងជ្រាលជ្រៅចំពោះអាជ្ញាធរគ្រប់លំដាប់ថ្នាក់ ដែលបានយកចិត្តទុកដាក់ និងផ្ដល់នូវការលើកទឹកចិត្តដល់ពួកគាត់។ ពួកគាត់បានប្តេជ្ញាចិត្តថានឹងប្រកាន់ខ្ជាប់នូវច្បាប់ចរាចរណ៍ និងគោរពវិន័យផ្សេងៗ ដើម្បីធ្វើដំណើរទៅកាន់លំនៅឋានប្រកបដោយសុវត្ថិភាព និងត្រៀមខ្លួនអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរនាពេលដ៏ខ្លីខាងមុខនេះ ជាមួយក្រុមគ្រួសារដោយក្តីសោមនស្សរីករាយ។

ព្រឹត្តិការណ៍ដ៏មានអត្ថន័យនេះ បានបង្ហាញពីស្មារតីសាមគ្គីភាព និងការយកចិត្តទុកដាក់ចំពោះពលករខ្មែរ ដែលជាកម្លាំងចលករដ៏សំខាន់ក្នុងការរួមចំណែកដល់ការអភិវឌ្ឍសេដ្ឋកិច្ចជាតិ។ ការរៀបចំនេះក៏បានរួមចំណែកបង្កើតនូវបរិយាកាសដ៏កក់ក្តៅ និងស្និទ្ធស្នាលនៅតាមព្រំដែន ដែលជាច្រកទ្វារដ៏សំខាន់ក្នុងការស្វាគមន៍ការវិលត្រឡប់របស់បងប្អូនប្រជាពលរដ្ឋខ្មែរមកកាន់មាតុភូមិវិញក្នុងឱកាសដ៏ពិសេសនេះ។

សូមបញ្ជាក់ថាប្រមុខរាជរដ្ឋាភិបាលកម្ពុជា-ថៃ បានលើកលែងតម្លៃសេវាការអនុញ្ញាតចេញ-ចូលប្រទេសថៃនៅតាមច្រកទ្វារព្រំដែនអន្តរជាតិកម្ពុជា-ថៃ សម្រាប់បងប្អូនពលករខ្មែរវិលត្រឡប់មកស្រុកកំណើត ក្នុងអំឡុងពេលពិធីបុណ្យចូលឆ្នាំថ្មីប្រពៃណីជាតិខ្មែរនេះ៕

ដោយ ឈុន សារ៉ាត