AKP ភ្នំពេញ ថ្ងៃទី០២ ខែមេសា ឆ្នាំ២០២៥ -- យោងតាមធនាគារកណ្តាលថៃ (BoT) បានឱ្យដឹងថា ហេដ្ឋារចនាសម្ព័ន្ធនៃការទូទាត់ហិរញ្ញវត្ថុ និងក្រុមហ៊ុនធុរកិច្ចរបស់ប្រទេសថៃ នៅតែមិនរងផលប៉ះពាល់បន្ទាប់ពីមានគ្រោះរញ្ជួយដីដ៏ខ្លាំងមួយនៅក្នុងប្រទេសមីយ៉ាន់ម៉ា ដែលបានធ្វើឱ្យមានការរញ្ជួយពេញទីក្រុងបាងកកកាលពីថ្ងៃទី២៨ ខែមីនា។

អភិបាលរងធនាគារ BoT លោក រូង ម៉ាល់លីកាម៉ាស់ (Roong Mallikamas) បាននិយាយកាលពីថ្ងៃទី៣១ ខែមីនា ដោយពណ៌នាអំពីផលប៉ះពាល់នោះថាជាការភ្ញាក់ផ្អើលរយៈពេលខ្លី ដោយស្ថាប័នហិរញ្ញវត្ថុបន្តផ្តល់សេវាកម្មជាធម្មតាសម្រាប់អតិថិជនលក់រាយ និងសាជីវកម្ម។

សហព័ន្ធ​ឧស្សាហកម្ម​ថៃ​បាន​បញ្ជាក់​ថា ​ការ​ផលិត ​និង​ការ​នាំ​ចេញ​មិន​មាន​ផល​ប៉ះពាល់​ទេ ខណៈដែលពាណិជ្ជកម្ម​តាម​ព្រំដែន​ថៃ​-​មីយ៉ាន់ម៉ា​នៅ​តែ​មាន​លក្ខណៈ​ធម្មតា។

លោក អាសាដេច គង់ស៊ីរី (Asadej Kongsiri) ប្រធានផ្សារហ៊ុនថៃបាននិយាយថា មូលដ្ឋានគ្រឹះរបស់ក្រុមហ៊ុនចុះបញ្ជីនៅតែមានភាពរឹងមាំហើយអាជីវកម្មកំពុងគ្រប់គ្រងស្ថានការណ៍ប្រកបដោយប្រសិទ្ធភាព។

គណៈកម្មការមូលបត្រថៃធានាថា ប្រព័ន្ធជួញដូរនៅតែដំណើរការពេញលេញ។ ទន្ទឹមនឹងនេះដែរ ការិយាល័យគណៈកម្មការធានារ៉ាប់រងបាននិយាយថា ស្ថានភាពហិរញ្ញវត្ថុរបស់ក្រុមហ៊ុនធានារ៉ាប់រងនៅមានភាពរឹងមាំនិងអាចទប់ទល់នឹងផលប៉ះពាល់ហិរញ្ញវត្ថុនៃអគារដែលបានដួលរលំ និងការរញ្ជួយដី៕

ដោយ៖ យា ចិន្ដាខន្ដី (ប្រភព៖ VN