AKP ភ្នំពេញ ថ្ងៃទី០២ ខែមេសា ឆ្នាំ២០២៥ -- ប្រធានាធិបតីអាល់ហ្សេរីលោក អាប់ដេលម៉ាដជីដ តេបប៊ូន (Abdelmadjid Tebboune) និងសមភាគីបារាំង លោក អេមម៉ានូអែល ម៉ាក្រុន (Emmanuel Macron) បានសន្ទនាតាមទូរស័ព្ទក្នុងអំឡុងពេលដែលភាគីទាំងពីរបានយល់ព្រមបន្តនូវកិច្ចសហប្រតិបត្តិការផ្នែកសន្តិសុខ និងការធ្វើចំណាកស្រុករវាងប្រទេសទាំងពីរ។

មេដឹកនាំទាំងពីរបានធ្វើការពិភាក្សាដោយ «បើកចំហ និងស្និទ្ធស្នាល»អំពីស្ថានភាពនៃទំនាក់ទំនងទ្វេភាគី និងភាពតានតឹងដែលបានប្រមូលផ្តុំក្នុងប៉ុន្មានខែថ្មីៗនេះ ហើយបានរំលឹកឡើងវិញនូវឆន្ទៈរបស់ពួកគេក្នុងការបន្តកិច្ចសន្ទនាប្រកបដោយផ្លែផ្កាដែលបានបង្កើតឡើងនៅក្នុងខែសីហា ឆ្នាំ២០២២។

ពួកគេបានយល់ព្រមលើតម្រូវការសម្រាប់ការត្រលប់ទៅការសន្ទនាស្មើភាពគ្នារវាងប្រទេសទាំងពីរ និងសម្រាប់ «ការបន្តឡើងវិញភ្លាមៗនៃកិច្ចសហប្រតិបត្តិការលើការធ្វើចំណាកស្រុកក្នុងលក្ខណៈគួរឱ្យទុកចិត្ត រលូននិងមានប្រសិទ្ធភាព»។

យោងតាម​សេចក្តី​ថ្លែងការណ៍​បានឱ្យដឹង​ថា កិច្ច​សហប្រតិបត្តិការ​ផ្នែក​តុលាការ​ទ្វេភាគី​នឹង​ត្រូវ​បាន​បន្ត​ឡើង​វិញ​ដោយ​រដ្ឋមន្ត្រី​យុត្តិធម៌​បារាំង​ លោកហ្គេរ៉ាល់ដ៍ ដារម៉ានីន (Gerald Darmanin) ដោយរំពឹង​ថា​នឹង​ទៅ​បំពេញ​ទស្សនកិច្ច​នៅ​ប្រទេស​អាល់ហ្សេរី​នាពេល​ខាង​មុខ។

រដ្ឋមន្ត្រីការបរទេសបារាំង លោក ចៀន ណូអែល បាររ៉ុត (Jean-Noel Barrot) នឹងទៅបំពេញទស្សនកិច្ចនៅប្រទេសអាល់ហ្សេរី នៅថ្ងៃទី៦ខែមេសា ដើម្បីពង្រឹងវឌ្ឍនភាព ហើយប្រធានាធិបតីទាំងពីរបានយល់ព្រមជាគោលការណ៍ដើម្បីរៀបចំកិច្ចប្រជុំដោយផ្ទាល់នាពេលខាងមុខ។

ប្រទេសអាល់ហ្សេរីបាននឹងកំពុងជំរុញឱ្យរដ្ឋាភិបាលបារាំងទទួលស្គាល់ឧក្រិដ្ឋកម្មដែលបានធ្វើឡើងក្នុងអំឡុងការគ្រប់គ្រងអាណានិគមបារាំងរយៈពេល ១៣២ឆ្នាំជាជំហានមួយដែលប្រទេសអាល់ហ្សេរីមើលឃើញថាមានសារៈសំខាន់សម្រាប់ប្រជាជាតិទាំងពីរក្នុងការផ្លាស់ប្តូរចំពោះទុក្ខសោកកាលពីអតីតកាល និងបង្កើតទំនាក់ទំនងស្ថិរភាព និងស្ថាបនា។

កាលពីថ្ងៃទី២៣ ខែមីនា សភារបស់ប្រទេសអាល់ហ្សេរីបានបង្កើតគណៈកម្មការមួយដើម្បីតាក់តែងច្បាប់មួយដែលដាក់ទោសទណ្ឌដល់ការគ្រប់គ្រងអាណានិគមបារាំងដែលជាទង្វើមួយត្រូវបានចាត់ទុកថាជា«ប្រវត្តិសាស្ត្រ» និងគាំទ្រដោយសមាជិកសភា អ្នកប្រវត្តិសាស្រ្ត និងអ្នកជំនាញផ្នែកច្បាប់ក្នុងតំបន់៕

ដោយ៖ មូល មិនា (ប្រភព៖ ស៊ីនហួ)