AKP ភ្នំពេញ ថ្ងៃទី០២ ខែមេសា ឆ្នាំ២០២៥-- ដោយសហការជាមួយអគ្គនាយកដ្ឋានគោលនយោបាយ និងយុទ្ធសាស្ត្រនៃក្រសួងបរិស្ថាន គម្រោងការប្រើប្រាស់ និងផលិតកម្មប្រកបដោយនិរន្តរភាព (SCP) របស់អង្គការ WWF-កម្ពុជា វគ្គបណ្តុះបណ្តាលបញ្ជ្រាបការយល់ដឹងអំពី «ការលុបបំបាត់ប្លាសិ្ទកសម្រាប់វិស័យសាធារណៈ និងវិស័យឯកជន» ត្រូវបានរៀបចំឡើងនៅខេត្តមណ្ឌលគិរី។ 

មន្ត្រីអង្គការ WWF បានឱ្យដឹងនៅថ្ងៃទី០១ ខែមេសា ឆ្នាំ២០២៥ថា វគ្គបណ្តុះបណ្តាលបញ្ជ្រាបការយល់ដឹងអំពី «ការលុបបំបាត់ប្លាសិ្ទក សម្រាប់វិស័យសាធារណៈ និងវិស័យឯកជន» នៅខេត្តមណ្ឌលគិរី បានបង្ហាញពីកិច្ចខិតខំប្រឹងប្រែងរួមគ្នា ដើម្បីទប់ស្កាត់ និងកាត់បន្ថយការបំពុលសំណល់ប្លាស្ទិកលើដី (តំបន់ទេសភាព) អូរ និងតំបន់ការពារ។ 

សិក្ខាសាលានេះមានអ្នកចូលរួមសរុប៥២ នាក់ ក្នុងនោះមានស្ត្រី៩នាក់ ដោយផ្តោតទៅលើគោលបំណងសំខាន់ៗចំនួន៣ រួមមាន៖ ទី១. ការកាត់បន្ថយប្លាស្ទិក និងការសាកល្បងការលុបបំបាត់ប្លាស្ទិកក្នុងវិស័យសាធារណៈ ទី២. ការកាត់បន្ថយប្លាស្ទិក និងការបញ្ជ្រាបកិច្ចសន្ទនាអំពីការលុបបំបាត់ប្លាស្ទិកទៅកាន់សហគមន៍ និងទី៣. ការកាត់បន្ថយប្លាស្ទិក និងរង្វិលជុំក្នុងវិស័យឯកជន៕

ដោយ ណយ នឿន (ប្រភព៖ WWF)