AKP កណ្ដាល ថ្ងៃទី០១ ខែមេសា ឆ្នាំ២០២៥ -- ឯកឧត្តម អ៊ុច បូរិទ្ធ ប្រធានស្តីទីព្រឹទ្ធសភា នាព្រឹកថ្ងៃទី០១ ខែមេសា ឆ្នាំ២០២៥ បានដឹកនាំក្រុមសមាជិកព្រឹទ្ធសភាប្រចាំភូមិភាគទី៣ អញ្ជើញចុះពិនិត្យការដ្ឋានសាងសង់ស្ពានបេតុងអាម៉េប្រវែង១០៨ម៉ែត្រ ទទឹង១០ម៉ែត្រ ដំណាក់កាលទី១ ស្ថិតក្នុងឃុំប្រាសាទ ស្រុកស្អាង ខេត្តកណ្តាល ដោយក្នុងឱកាសនេះគណៈប្រតិភូទទួលបាននូវការស្វាគមន៍យ៉ាងកក់ក្តៅបំផុតពី ឯកឧត្តម ឧត្តមសេនីយ៍ទោ សែម រតនា អនុប្រធានទី១គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព ក្នុងនាមជាថ្នាក់ដឹកការសាងសង់។

បើតាមឯកឧត្តម ឧត្តមសេនីយ៍ទោ សែម រតនា បានឱ្យដឹងថា ភូមិសាស្ត្រឃុំប្រាសាទនេះគឺជាដីកោះដាច់ស្រយ៉ាលមួយនៃតំបន់ទំនាបក្នុងចំណោមឃុំទាំង១២ នៃស្រុកស្អាង ហ៊ុំព័ទ្ធដោយព្រែកប្រាសាទ (ដៃទន្លេបាសាក់ក្រោម) និងតែងតែទទួលរងនូវជំនន់ទឹកលិចរៀងរាល់ឆ្នាំ ដែលបង្កជាផលប៉ះពាល់យ៉ាងធ្ងន់ធ្ងរដល់ជីវភាពរស់នៅរបស់ប្រជាពលរដ្ឋ បង្កការលំបាកក្នុងការធ្វើដំណើរទៅប្រកបរបរអាជីវកម្មប្រចាំថ្ងៃ សិស្សានុសិស្សទៅរៀន ទៅទទួលសេវាសុខាភិបាល ឬមន្ទីរពេទ្យ និងការដឹកជញ្ជូនផលិតផល កសិកម្មផ្សេងៗ ព្រមទាំងត្រូវចំណាយថវិកាលើសេវាទូកចម្លង និងរង់ចាំរយ:ពេលយូរ ជាពិសេសនៅពេលយប់ពុំមានសេវាទូកចម្លងដំណើរការ។

ឯកឧត្តមបានបន្តថា ការកសាងស្ពាននេះឡើង គឺជាគំនិតផ្តួចផ្តើមរបស់ ឯកឧត្តម អ៊ុច បូរិទ្ធ ប្រធានស្តីទីព្រឹទ្ធសភា និងជាប្រធានក្រុមការងារចុះជួយមូលដ្ឋានឃុំប្រាសាទ និងឯកឧត្តមនាយឧត្តមសេនីយ៍ សែម សុវណ្ណនី អតីតអគ្គនាយកមជ្ឈមណ្ឌលជាតិ និងជាអនុប្រធានក្រុមការងារចុះជួយមូលដ្ឋានឃុំប្រាសាទ ដោយកស្ពានបេតុងនេះគឺជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ ការស្ថាបនាស្ពានបេតុងនេះត្រូវបានចែកចេញជាពីរដំណាក់កាល ដោយអនុវត្តតាមបទដ្ឋានបច្ចេកទេសរបស់ក្រសួងសាធារណការ និងដឹកជញ្ជូន។

នាឱកាសនោះ ឯកឧត្តម អ៊ុច បូរិទ្ធ បានចាត់ទុកការសាងសង់ស្ពានបេតុងនេះថាជាចំណងដៃជូនដល់ប្រជាពលរដ្ឋ ដែលជានិច្ចជាកាលមានទំនុកចិត្តជឿជាក់ គាំទ្ររាជរដ្ឋាភិបាល ប្រឹងប្រែងការពារសន្តិភាពឱ្យបានគង់វង្ស និងជាការឆ្លើយតបបញ្ហាប្រឈមដែលប្រជាពលរដ្ឋតែងតែលើកឡើង ដោយក្រុមការងារចុះមូលដ្ឋានបានខិតខំយកចិត្តទុកដាក់ជំរុញឱ្យស្ពានបេតុងមួយនេះបានចាប់ផ្តើមសាងសង់នាពេលនេះ ដែលជាផ្នែកមួយចូលរួមអភិវឌ្ឍន៍ លើកស្ទួយហេដ្ឋារចនាសម្ព័ន្ធប្រទេសជាតិ ស្របតាមគោលនយោបាយយុទ្ធសាស្ត្របញ្ចកោណ ដំណាក់កាលទី១ មានអាទិភាពគន្លឹះ៥គឺ មនុស្ស ផ្លូវ ទឹក ភ្លើង និងបច្ចេកវិទ្យា របស់រាជរដ្ឋាភិបាល ដែលមានសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីជាប្រមុខដឹកនាំ ហើយថាចំពោះផលប្រយោជន៍ពេលស្ពានស្ថាបនារួចរាល់គឺមានតម្លៃយ៉ាងធំធេង និងដើរតួនាទីយ៉ាងសំខាន់ ដើម្បីសម្រួលដល់ការធ្វើដំណើរឆ្លងកាត់ឱ្យកាន់តែប្រសើរឡើងក្នុងការតភ្ជាប់គ្នារវាងភូមិទាំង៥ នៃឃុំប្រាសាទទៅឃុំត្រើយស្លា ផ្លូវជាតិលេខ២១ និងផ្លូវជាតិលេខ១៕

ដោយ៖ ចាន់ សុភឿន