AKP ភ្នំពេញ ថ្ងៃទី០១ ខែ មេសា ឆ្នាំ ២០២៥ -- ឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មានបានអំពាវនាវដល់គ្រប់ភាគីចូលរួមប្រយុទ្ធប្រឆាំងព័ត៌មានក្លែងក្លាយ ព្រោះព័ត៌មានក្លែងក្លាយពិតជាមានគ្រោះថ្នាក់បំផុតចំពោះជាតិ និងសម្រាប់សង្គម ហើយកំពុងជួបបញ្ហាប្រឈមទាំងនៅកម្ពុជា ក៏ដូចជានៅក្នុងពិភពលោកនាពេលបច្ចុប្បន្ន។ ការអំពាវនាវរបស់ឯកឧត្ដមរដ្ឋមន្រ្ដីបែបនេះ ក្នុងពិធីបើកយុទ្ធនាការប្រឆាំងព័ត៌មានក្លែងក្លាយដោយ«និយាយថាទេចំពោះព័ត៌មានក្លែងក្លាយ» នាថ្ងៃទី០១ ខែមេសា ឆ្នាំ២០២៥ នៅក្រសួងព័ត៌មាន។ ក្នុងពិធីប្រកាសជាផ្លូវការនៃការបើកយុទ្ធនាការលើកដំបូងប្រឆាំងព័ត៌មានក្លែងក្លាយនេះ ក៏មានការអញ្ជើញចូលរួមពីសំណាក់ថ្នាក់ដឹកនាំក្រសួងព័ត៌មាន ថ្នាក់ដឹកនាំមន្ទីរព័ត៌មានរាជធានី ខេត្ត ដែលទទួលបន្ទុកការងារព័ត៌មាន អ្នកសារព័ត៌មានជាតិ អ្នកមានឥទ្ធិពលក្នុងបណ្តាញសង្គម ដោយបានចូលរួមផ្ទាល់ និងតាមរយៈប្រព័ន្ធវីដេអូ ប្រមាណជាង១ពាន់នាក់។

ឯកឧត្ដម នេត្រ ភក្រ្ដា បានថ្លែងដោយចោទសួរថាតើមូលហេតុអ្វីទើបជំរុញឱ្យមានការបើកយុទ្ធនាការដោយ«និយាយថាទេចំពោះព័ត៌មានក្លែងក្លាយ»  ដោយឯកឧត្តមរដ្ឋមន្រ្តីបានពន្យល់ថា បច្ចុប្បន្ននេះប្រជាពលរដ្ឋភាគច្រើនបានទទួលព័ត៌មានពីប្រព័ន្ធផ្សព្វផ្សាយបែបទំនើបក្នុងនេះមានដូចជាបណ្តាញទំនាក់ទំនងសង្គម ហ្វេសប៊ុក Instagram TikTok Messenger ជាដើម។ ហេតុនេះហើយទើបបង្កើតឱ្យមានការចោទឡើងទៅលើជំនឿទុកចិត្តនៃការប្រើប្រាស់ប្រព័ន្ធព័ត៌មាន។ ឯកឧត្ដមរដ្ឋមន្រ្ដីបានថ្លែងបញ្ជាក់ថា ដោយសារតែព័ត៌មានពិត និងព័ត៌មានក្លែងក្លាយនៅលាយឡំគ្នា ហេតុនេះហើយទើបបានបង្កើតឱ្យចោទជាសំណួរដែលថាតើព័ត៌មាននោះពិតឬក៏មិនពិត ក្នុងចំណោមអ្នកប្រើប្រាស់ ។ ឯកឧត្ដមបន្ដថា ទាំងអស់នេះហើយបង្ហាញពីអសុវត្តិភាពក្នុងការប្រើប្រាស់របស់ប្រជាពលរដ្ឋ ធ្វើឱ្យពួកគាត់ មានឧបសគ្គជាមួយដែលថាព័ត៌មានដែលកើតមានឡើងនេះពិត ឬក៏អត់ ហើយតាមរយៈនេះគឺជាការចាំបាច់ណាស់ដែលក្រសួងព័ត៌មានត្រូវសហការជាមួយភាគីពាក់ព័ន្ធប្រយុទ្ធប្រឆាំងព័ត៌មានក្លែងក្លាយឡើង។ ឯកឧត្តមរដ្ឋមន្រ្តីបានគូសបញ្ជាក់ថា៖ «ក្រសួងទើបបានដាក់ចេញនូវវិធានការនៃសន្តិសុខព័ត៌មាន ជូនដល់ប្រជាពលរដ្ឋខ្មែររបស់យើង។ ដោយក្នុងនេះផ្តោតសំខាន់ទៅលើសិទ្ធិទទួលបានព័ត៌មាន របស់ប្រជាពលរដ្ឋ ទី២ គុណភាពព័ត៌មានដែលប្រជាពលរដ្ឋប្រើប្រាស់ និងទី៣គឺសុវត្តិភាពព័ត៌មាន»។

ជាមួយគ្នានេះ ឯកឧត្តម នេត្រ ភក្រ្តា បានថ្លែងបញ្ជាក់ទៀតថា ព័ត៌មានក្លែងក្លាយបង្កប៉ះពាល់ខ្លាំង បើទោះបីយើងមើលទៅហាក់ដូចជាមិនសូវសំខាន់ ប៉ុន្តែព័ត៌មានក្លែងក្លាយនេះបានកំពុងបំផ្លាញសង្គមរបស់យើង បើសិនជាយើងមិនមានវិធានការទាន់ពេលវេលាក្នុងការទប់ស្កាត់ទេ។ «ព័ត៌មានក្លែងក្លាយបានបំផ្លាញជំនឿទុកចិត្តរបស់ប្រជាជនចំពោះអាជ្ញាធរ ចំពោះអ្នកពាក់ព័ន្ធ ក្រសួងស្ថាប័ននានា ។

ព័ត៌មានក្លែងក្លាយនឹងធ្វើឱ្យប្រជាពលរដ្ឋសម្រេចចិត្តខុស ដែលទាំងអស់នេះហើយបានជះផលអាក្រក់ដល់សង្គមរបស់យើង»។ នេះគឺជាការបញ្ជាក់បន្ថែមរបស់ឯកឧត្ដម នេត្រ ភក្រ្ដា។
ឯកឧត្ដមរដ្ឋមន្រ្តីក្រសួងព័ត៌មានក៏បានថ្លែងឱ្យដឹងផងដែរថា ការអប់រំផ្សព្វផ្សាយទៅដល់សាធារណជនឱ្យបានយល់អំពីអ្វីទៅដែលជាព័ត៌មានក្លែងក្លាយ ផលប៉ះពាល់នៃព័ត៌មានក្លែងក្លាយ និងផ្តល់វិធានការការពារខ្លួន គឺជាកិច្ចការងារដែលក្រសួងនឹងធ្វើជាបន្តបន្ទាប់ទៅមុខ។

ទន្ទឹមនេះ ឯកឧត្ដមរដ្ឋមន្រ្ដីបានអះអាងថា ក្រសួងក៏បានផ្តោតសំខាន់ទៅលើកិច្ចសហការជាមួយអង្គភាពសារព័ត៌មាន និងកិច្ចសហការជាមួយអន្តរជាតិ ក្នុងក្របខ័ណ្ឌការទូតព័ត៌មាន ដែលក្រសួងព័ត៌មាននឹងធ្វើកិច្ចការនេះបន្តទៅទៀត។ លើសពីនេះទៀត កន្លងមកក្រសួងបានសហការជាមួយបណ្តាប្រទេសអាស៊ាន បណ្តាប្រទេសក្នុងតំបន់ ដើម្បីចងជាបណ្តាញក្នុងការទប់ស្កាត់ ក៏ដូចជាផ្តល់នូវព័ត៌មានពិតត្រឹមត្រូវ ដើម្បីកាប់បន្ថយនូវព័ត៌មានក្លែងក្លាយ សំដៅធ្វើយ៉ាងណាឱ្យប្រជាពលរដ្ឋក្នុងតំបន់បានទទួលព័ត៌មានពិតប្រាកដ៕

ដោយ៖ ដេប៉ូ, រូបថត៖ ឡុង ដេវីត